Del 29 d’abril al 8 de mayu celébrase la 45 Selmana de les Lletres Asturianes, qu’esti añu va tar dedicada a Conceyu Bable, movimientu fundáu en 1974 que tuvo un papel bien importante na defensa de la llingua y la cultura d’Asturies na transición democrática. Como ye vezu, dientro de la programación d’actos va haber esposiciones, alderiques, proyecciones y va editase una obra conmemorativa que se va regalar el 3 de mayu, Día de les Lletres Asturianes, nos puntos de venta de les tiendes asociaes. La música tamién va tener espaciu con dos actos: un conciertu homenaxe al Nuevu Canciu Astur y el Conciertu de les Lletres Asturianes de la OSPA.
Xaime Martínez y la Familia Tradicional, Mapi Quintana y L-R van ser los encargaos de poner son al espectáculu poético-musical n’homenaxe al Nueu Canciu Astur, movimientu musical coetáneu a Conceyu Bable que punxo banda sonora a la reivindicación de la cultura, la llingua y la identidá asturiana ente mediaos de los años 70 y primeros de los 80. Xunto a estos artistes va tar la poeta Izar Gayo poniendo lliteratura a esta orixinal propuesta que va desendolcase’l martes 30 nel Muséu de Belles Artes d’Uviéu ente les 18h y les 20h y nel qu’amás va haber una visita guiada a la esposición Conceyu Bable y l’arte contemporaneu.
D’otra banda, el xueves 2 de mayu a les 20h, l‘Auditoriu Príncipe Felipe va acoyer el Conciertu de les Lletres Asturianes, al cargu de la Orquesta Sinfónica del Principáu d’Asturies (OSPA). Baxo la dirección del maestru Daniel Sánchez Velasco, el programa inclúi les pieces Chichén Itzá (M. T. Prieto), Conciertu pa dos pianos, percusión y orquesta (B. Bartok) y Tres canciones asturianes (Daniel Sánchez). Nel recital participen como solistes Martín García García (pianu), Juan Barahona (pianu), Rafael Casanova (percusión) y Francisco Revert (percusión). P’asistir al actu ye preciso sacar la entrada, gratuita, que yá ta disponible nesti enllaz.
Llibru de regalu y descuentu
Como tolos años, el Día de les Lletres Asturianes, delles llibreríes y tiendes van regalar un llibru dedicáu a la persona, entidá o temática la que ta dedicada la edición. Nesta ocasión la obra entitúlase Conceyu Bable. El frutu y la semiente, ta coordinada por Paco Álvarez y musicasturiana.com va ser ún de los puntos de regalu con cada discu, vinilu o llibru vendíu na so tienda online, na oficina de Xixón o nel espaciu que tien dientro de la tienda de Puru Remangu n’Uviéu. Amás, va facese un 10% de descuentu nos artículos vendíos esi día.
Suscríbite a les nuestres novedaes
