Nel branu de 1961, en metá del réxime franquista, el grupu d’etnomusicólogos italianos Cantacronache, pioneros del folk políticu nel so país, viaxó pel Estáu español pa compilar cantares populares de resistencia. Foi un desafíu al facismu, el so llabor quedó rexistráu en cintes y semeyes y, más seis décades dempués, la película La Marsellesa de los borrachos fai alcordanza d’estos fechos dende l’audiovisual y la música d’anguaño.
El cantautor xixonés Nacho Vegas, el dúu de post-folk L-R y el Coru Mineru de Turón son los nomes asturianos que tán presentes nesti documental que sigue los pasos d’aquel viaxe clandestín que fixeron Cantacronache. Xunto a los músicos d’equí, participen otros proyectos como Maria Arnal, Amorante o Labregos do tempo dos Sputniks, que s’encarguen de reinterpretar aquel cancioneru obreru, intelectual y campesín que compilaron los militantes culturales italianos.
Dirixíu por Pablo Gil y con producción y guión de la carbayona Alba Lombardía, La Marsellesa de los borrachos va proyectase esti xueves 13 a les 19.30h nos cines Embajadores Foncalada d’Uviéu. L’actu abre’l cinefórum Tiempu d’Hestoria qu’entama’l diariu dixital Nortes y nél va participar Lombardía y la directora de Memoria Democrática, Begoña Collado.
Suscríbite a les nuestres novedaes
