Dempués de cinco años dende que l’artista de pop llariegu Vicente Díaz donara’l so archivu personal al Conceyu de Sotu’l Barcu, entamen el llabor pa facer realidá’l so muséu. Una sala d’esposiciones na Casa la Cultura de L’Arena va ser l’escenariu d’esti espaciu d’homenaxe que va poder visitase previsiblemente esti branu y nel que van poder vese los trofeos, premios y demás llogros que’l cantante algamó nestes cuasique cinco décades de carrera, amás de dalgunes pieces audiovisuales coles sos actuaciones dientro y fuera de la llende d’Asturies.
Vicente Díaz ye probablemente’l nome más popular de la historia de la música asturiana. Entamó dende bien neñu a cantar y a ganar una montonera de premios en concursos de canción asturiana. Sicasí, l’éxitu llegó cuando trabayó un estilu propiu que pue definise como Pop Llariegu, un son caracterizáu por unes lletres costumistes y festives amestaes a composiciones pop del so tiempu. Asina nació la lleenda del «Enllenapraos», el nomatu que-y punxo’l pueblu asturianu a cuenta de que nun había romería onde Vicente tocara y onde’l prau de la fiesta nun tuviera hasta la bandera. Publicó 23 discos, de los que vendió miles de copies.
Suscríbite a les nuestres novedaes
