Publícase un videu de La Buelga, el proyectu musical qu’avera a Irlanda y Asturies

El pasáu xunetu los músicos Leticia Baselgas y Rubén Bada (L-R, Calea…) tuvieron participando nel proyectu La Buelga, una residencia artística entamada pol guitarrista irlandés Ewan Cowley. financiada pol Arts Council -l’axencia del gobiernu irlandés pal desendolcu de la cultura nesi país- y que tuvo l’oxetivu d’averar y trabayar coles músiques y cultures de los dos países celtes, como cuntó Bada pa MUSICASTURIANA.COM. Agora’l promotor d’esta iniciativa publica na so canal de YouTube un videu resume de la esperiencia.

Nel videu -con subtítulos n’inglés- los músicos irlandeses Andy Reilly (percusiones), Mark Redmond (gaites y flautes), Rubén Bada (guitarra, violín y buzuqui), Leticia Baselgas (pandereta y panderu) y Ewan Colley (guitarra y mandolina), cunten cómo vivieron esti proyectu desendolcáu en County Wexford, condáu asitáu nel sureste irlandés. Falen de cómo nació esta collaboración, d’esta forma novedosa de trabayar ente músicos, de lo arriquecedor de compartir y conocer les dos cultures o de la importancia de la muyer na música tradicional. Amás d’ello puen vese fragmentos de los temes qu’interpretaron en directo, formaos por pieces tradicionales y por cantares de L-R iguaos pa la ocasión.

Mercar CDs y vinilos de L-R