“Quirosanu” ye’l primer single de Balagar, grupu nuevu “folkixeru”
Yá ta disponible nes plataformes dixitales el tema “Quirosanu” col que se da a conocer Balagar, un grupu musical que fae de la folklixa’l so estilu personal y musical.
Esti grupu formóse nel añu 2013, pero tres d’años en baldre reúnense esti 2022 pa entamar a asoleyar los sos temes y el so espectáculu musical nel que busquen que la xente lo pase como los indios del entamu al fin.
Pal single “Quirosanu” entamen una campaña nes redes sociales nel que la xente que quiera collaborar pue mandar los sos videos baillando’l tema pa faer un «cachu videoclí» cola xente que participe.
Esti cantar ye l’entamu del grupu pa Pelayo Fernández, Andrey Méndez y el gaiteru Tever, tres gallos pal mesmu corral, que quieren facer baillar a toa Asturies y más allá de les nuestres llendes. Dan el so primer pasu con esta pieza, pero tienen na so tiesta pa que la xente esfrute de la so folklixa de música asturiana.
