Ramón Prada participa na obra conmemorativa del 50 aniversariu del festival de Lorient

El Festival Intercelticu de Lorient/An Oriant llega a la so cincuenta edición -tendría que tenese desarrollao l’añu pasáu pero por cuenta del andanciu nun pudo ser- y prepara una programación perespecial y variada centrada nel país anfitrión: Bretaña.

Por cuenta d’esti aniversariu, frutu de la collaboración ente’l festival y la Orquesta Nacional de Bretaña, encargóse la composición d’una obra orixinal pa ser estrenada na so próxima edición. La mesma, titulada ‘Finisterres Celtiques’, tien cinco movimientos, compuestos por Ramon Prada (Asturies), Frédérique Lory (Bretaña), Paul Leonard Morgan (Escocia), Sir Karl Jenkins (Gales) y Bill Whelan (Irlanda). Nella intervienen más de quince solistes de les naciones celtes: Ross Ainslie, Xosé Ambás, Abraham Cupeiro, Hevia, Catrin Finch, Anxo Lorenzo, Marthe Vassallo, Fiona Monbet… El proyectu algamó, amás, ún de los premios que concede la Fundación Grand Ouest.

La propia organización del Festival Intercélticu de Lorient (ún de los más importantes del mundu) comentaba tocántenes a esta obra: «Esti afondamientu nel corazón del mundu celta va llevate en un viaxe musical al traviés d’atmósferes, lleendes, soníos y idiomes celtes. La bayura y diversidá d’estos pueblos asentaos nel Arcu Atlánticu européu foron quien a crear, gracies a l’apertura a los demás y a la esperimentación, una cultura orixinal y evolutiva que sobrevivió a los sieglos».

Dexa un comentariu

X