“Tengo un vieyu en casa”, lyric video de Cantares de… y pa nen@s

Tercer adelantu de Cantares de… y pa nen@s, el proyectu conxuntu de Fernando Valle Roso y Silvia Moreno. Tres de superar con éxitu la campaña de crowdfunding y depués de llanzar los singles “La rumba del Nalón” y “Ríu Verde“, esti dúu publica una obra audiovisual qu’acompaña’l cantar “Tengo un vieyu en casa“. L’álbum completu asoleyará enantes qu’acabe esti 2021.

Asina presenta’l dúu esti nuevu proyectu musical:

“La música asturiana cuenta con bien de cantares empleaos por neños, rapazos y mozos nos sos xuegos y actividades cotidianes. La radio y la televisión fueron arrequexando col tiempu estos cantares tradicionales, faciendo que la xente los escaeciera en beneficiu d’otros sones y d’otros cantares. De manera que, d’entós p’acá, varies xeneraciones d’asturianos perdieron dafechu’l contactu con ellos, a nun ser nel círculu familiar o d’amistá más cercanu.

Esti proyectu nació fai años como conciertu didácticu col oxetivu de tresmitir estos cantares nos centros escolares asturianos a les futures xeneraciones. Agora, la idea ye desarrollalu en formatu discográficu.

Ente los temes escoyíos pa esti discu alcuéntrense sones empleaos na danza, corros, bailles, cantares de neños, hestories…”.

Comprar discos de música pa la reciella en na tienda online