Raúl Alonso: «La música n’asturianu trunfa»
Allá onde va, la música fecha n’asturianu trunfa. Nun ye un fechu suxetivu. Esta postrer fin de selmana de setiembre ye l’exemplu más nidiu de que la música del país tien puxu: Trasiegu Fest, Cachu Fest y Primer Alcuentru de Folclor de L’Infiestu son trés de los eventos qu’entamaron delles asociaciones y empreses nos que hubo una montonera de xente esfrutando de los sones asturianos. Nestos festivales y alcuentros hebo música de tou tipu: música de raigañu, ska, pop-rock, lletrónica… y el resultáu foi siempres el mesmu, unos artistes xubíos a un escenariu que miraben a un públicu qu’enllenaba los espacios onde se desendolcaben estos conciertos.
Por poner un casu, namás na nueche musical qu’entamó’l Trasiegu Fest mientres el sábadu, más de 500 persones pasaron a sentir la música fecha por Algaire, Llevólu’l Sumiciu, La Tarrancha o Luis Núñez y Los Folgazanes. El ritmu de los sones punxo a esfrutar a tola xente que s’averó a Santolaya de Cabranes la nueche del sábadu.
«Eventos como’l Trasiegu Fest, el Cachu Fest o’l Primer Alcuentru de Folclor de L’Infiestu ponen en valir lo que se fai equí y llega a la sociedá. Poro, sofitar y esparder la música d’Asturies ye necesario»
Un exemplu que dexa a les clares que lo que se fai n’Asturies y n’asturianu interesa a la xente en dellos tramos d’edá. Siguiendo col casu del Trasiegu Fest, ente’l públicu que s’averó hasta Santolaya el sábadu y a Bimenes el domingu, hebo xente de munches edaes y con intereses culturales estremaos. Per un llau, el sábadu s’enllenó de xente mozo y xente adulto, un exemplu más de que seya cualesquier tipu que seya, la música asturiana tien puxu. Pela otra banda, el públicu de Bimenes, colos conciertos de Mestura y David Varela, amosó l’interés de les families por deprender y conocer la cultura y la música fecha n’asturianu.
Non solo eso, sinón que la música fecha n’asturianu interesa tamién más p’allá de les llendes asturianes. Con datos confirmaos de les organizaciones, hebo xente que se treslladó hasta Asturies pa, a lo menos, asistir a una de les propuestes musicales qu’esta fin de selmana enllenó Asturies de cultura musical col sofitu de delles instituciones públiques.
Poro, sofitar y esparder la música d’Asturies ye necesario. Con eventos como’l Trasiegu o el Cachu Fest, ponse en valir lo que se fai equí y llega a la sociedá, a la xente, non solo d’Asturies sinón más p’allá. Sofitar la música n’asturianu ye continxente. Eventos como estos, son necesarios.
