El sábadu 29 de payares los Kuivi Almacenes d’Uviéu van acoyer Artístiques, festival gratuitu entamáu por Puru Remangu y Ixuxú Cultura qu’axunta artes escéniques, música, artes plástiques, mocedá, diversidá llingüística y feminismu. La organización ta acabante d’anunciar que’l tríu de pandereteres y cantantes Rellume van andechar enriba l’escenariu cola artista vasca Süne nún de los cantares que va tocar. La programación musical complétenla la 1ª Muestra d’Asturianada Electrónica y los conciertos de gallega Catuxa Salom y la yá mentada Süne.
Ana Feito (La Pola Siero, 2006), Alba Suárez (Llaviana, 2004) y Alba Estrada (El Berrón, 2006) formen Rellume, un grupu de pandereteres moces que s’estrenaron esti añu en directo, anque elles lleven cuasique tola vida tocando, cantando y baillando en dellos colectivos de música tradicional como’l Grupu de Baille Tradicional Fitoria, el Grupu Folclóricu y d’Investigación El Ventolín, y Muyeres -nel casu d’Alba Suárez-. La so propuesta ta formada por repertoriu de música pal baille, respetando les estructures tradicionales, pero con toque personal col que dar un relumbrón nuevu a la pandereta y al su son.
La collaboración con Süne ye la última incorporación al festival Artístiques qu’anunciaron Puru Remangu y Ixuxú Cultura. Esto súmase a la 1er Muestra d’Asturianada na que les cantadores Alicia Villanueva (Bimenes, 2000) y Lucía Rojo (Mieres del Camín, 2002), son les protagonistes d’esta muestra na que se van estrenar 6 pieces inédites. La yerbata arrodióse de la producción musical de Llevólu’l Sumiciu y de les lletres de la escritora Blanca Fernández (Bimenes, 1994). Cola mierense andecharon el productor Fruela 757 la escritora y música Marina Pangua (Uviéu, 1992) y la poeta y tamién música Ánxela Gómez d’Ávila (Avilés, 1991). La DJ Lidia Friera va ser quien acompañe a les cantadores nel escenariu pinchando les producciones creaes a costa fecha pal eventu.
N’Artístiques tamién van actuar Catuxa Salom cola so propuesta que ye una mestura de ritmos indíxenes arxentinos, música tradicional gallega y bases electróniques enérxiques y Süne, artista euskaldun que dempués del so éxitu col grupu Huntza tien agora esti proyectu nel qu’avera’l soníu de la trikitixa (cordión diatónica vasca) a sonoridaes electróniques.
Amás de música, el programa d’Artístiques axunta artes escéniques y plástiques. La estaya d’artes escéniques fórmenla les actuaciones de danza de Xana Llaneza; el monológu poéticu-escénicu de Paula Mata; el microteatru de la estudiante de la ESAD (Escuela Superior de Arte Dramático) Carmen Capellá; y la performance de les tamién alumnes de la ESAD Adriana Yáñez, Nora Junquera y Julia Azcano. Na estaya d’artes plástiques van crear una obra en vivo les artistes María Ortiz, Luzia Pedregal, Iratxe Esteve, Juls, Inés Benito, Clara Nieto, Celia Pandiella, Dido Carrero y les estudiantes de la ESAPA (Escuela Superior d’Arte del Principáu d’Asturies) Raquel Mañana y de la Escuela d’Arte d’Uviéu Lucía Álvarez. Too esto va poder vese’l sábadu 29 de payares dende les 19h nos Kuivi Almacenes y con entrada de baldre.
Suscríbite a les nuestres novedaes
