El Festival Internacional del Mundu Celta d’Ortigueira vuelve un añu más, del 8 al 12 de xunetu, consolidándose como ún de los grandes referentes internacionales de la música folk y celta. Nesta edición, la presencia asturiana va tener un papel destacáu tanto nos escenarios principales como nes actuaciones del Festival na Rúa, llevando la música tradicional del país a miles de visitantes.
Ente los nomes más destacaos ta’l trío Rellume, una formación moza y enérxica de pandereteres que representa la nueva xeneración de la música tradicional asturiana. El grupu, formáu por Ana Feito, Alba Suárez y Alba Estrada, va llevar al escenariu un directu potente y cercanu, nel que combinan raigañu y baille con una propuesta escénica actual. La so actuación n’Ortigueira va ser el 10 de xunetu, a les 21:30 hores.
Otra de les cites importantes va ser la del dúu formáu pol gaiteru avilesín Rubén Alba y Nel de Purnea. La so actuación supón una síntesis del so trabayu musical, onde fusionen la tradición cola innovación sonora, reinterpretando pieces tradicionales y aportando composiciones propies con un enfoque contemporaneu. La so actuación conxunta va ser el 11 de xunetu a les 20:00 hores na Vila Celta. Pela so parte, Rubén Alba tamién va xubir al escenariu Estrella Galicia‘l mesmu día a les 2:15 hores.
Amás, la presencia asturiana espándese peles cais d’Ortigueira col Festival na Rúa, onde participen agrupaciones como la Banda Gaites Saxum, el Grupu Etnográficu L’Oriente Llacín y la Bandina Los Marnuetos, encargándose d’animar la villa y averar la música tradicional al públicu. Los primeros, tienen el turnu’l 11 de xunetu a les 16:00, mientres que los segundos van facer lo propio a les 19:00 hores y los últimos faen varios pases. Amás, GE L`Oriente va impartir un taller de baille tradicional asturianu. Va ser el 11 de xunetu, a les 11:00 de la mañana, nel IES d’Ortigueira.
Suscríbite a les nuestres novedaes
