Renaz Ixuxú Cultura como un proyectu pa trabayar dende Asturies con música en llingües minorizaes
En xineru de 2013 presentábase en sociedá Ixuxú Asturies-Euskal Herria Elkartea, un colectivu pa da-y difusión a la música y realidá social y cultural d’Asturies pel País Vascu. El proyectu fundólu l’actual responsable de Musicasturiana.com, Xicu Ariza, cuando estudiaba en Bilbao; cuntó cola participación d’otra xente emigrao; espardióse en 2015 n’Asturies col ciclu Glayíos/Oihuak Música en movimientu, Herriak mugatzen y llueu caltuvo una actividá de baxa intensidá hasta febreru de 2018. Diez años dempués de la so fundación y cinco de la so última actividá, Ixuxú renaz reconvertíu.
«Promotora de conciertos que trabaya con música y cultura que cumpla dalgún d’estos pegoyos: tar interpretada en llingües minorizaes; qu’esparda un mensaxe comprometíu socialmente; tar desendolcada por muyeres». con eses palabres Ixuxú Cultura llenda les blimes sobre les que va trabayar «mui sele programando conciertos de xemes en cuando». Al frente del proyectu vuelve tar Ariza que, baxo esta marca y el paragües de musicasturiana.com, desendolcó en 2022 la coordinación y producción del ciclu de presentaciones de novedaes discográfiques Amosando y la del recién Semando Fest, primer festival de música moza n’asturianu.
Dupla n’Asturies
La próxima actividá d’esti renacíu Ixuxú que se presenta agora públicamente va ser entamar n’Asturies dos conciertos del grupu Dupla. Les cites van ser el vienres 10 de marzu a les 21h nel Dilema Indie Club de Xixón y el sábadu 11 a les 22h en La Traviesa de L’Infiestu. Los conciertos son con entrada llibre y asina presenten dende Ixuxú a la banda: «Dupla ye un grupu de música urbana fecha nun entornu rural. Beñat Oribe (batería) y Gari Uriart (guitarra y voz) son del pueblu alavés d’Agurain -como La Polla Records y Kaotiko- y reflexen el sentir d’una mocedá alloñada d’etiquetes, de prexuicios y de purismos. Por eso faen reggaeton y punk; rap y folk; electrónica y rock; falen de fiesta y de llucha… too ello con un tastu pop nun directu que ye un españíu d’enerxía, actitú, diversión y desenfadu.
Entamaron en 2020; l’añu pasáu dieron el pelotazu con más de 50 conciertos en 9 meses; tienen un disco y dellos singles; con ellos collaboraron l’actriz y cantante Itziar Ituño (La Casa de Papel), los trikitilaris Joseba Tapia y Xabier Leturia, y míticos de la escena como Panxo ZOO, Juantxo Glaukoma, Pello Skakeitan o papá Evaristo Páramos. Ah! y por si teníeis dalguna duda, molen muncho».
