Ente güei y mañana, los conceyos de Llangréu, Corvera, Pravia, Nava, A Veiga y El Franco acueyen seis eventos nos que van poder sentise xéneros diversos: rock astur, música tradicional, pop y jazz de raigañu. David Varela abre l’axenda col so proyectu pa la reciella Restolando nel Centru Sociocultural de Les Vegues (Corvera) dende les 18h. Darréu d’ello, Muyeres dan el pregón del Festival Internacional de la Cerveza Artesano d’Asturies nos Xardinos de la Pinacoteca Eduardo Úrculo en La Felguera (Llangréu), onde pela nueche va poder esfrutase del espectáculu País Punk Rock -00h- nel que van participar quince músicos, y el grupu Skontra -1.30h-. La programación del vienres complétala la Orquesta Céltica Asturiana nel Auditoriu José Barrera de Pravia a les 20h.
El sábadu, el noroccidente asturianu ye l’escenariu de dos conciertos: Silvia Quesada nel Auditoriu Félix Menéndez d’A Veiga a les 20h y, media hora dempués, Xaime Arias Quartet con Sandra Álvarez nel Auditoriu As Quintas d’El Franco. Nesi intre, la música y el baille tradicionales van ocupar el Llagar Lolina de Nava -dende les 20h- nuna Nueche en danza.
Tola programación d’equí a los próximos meses pue vese na Axenda de Musicasturiana.com.
Suscríbite a les nuestres novedaes
