El tríu de folk entós, formáu por Celia Nieto -vigulín-, Adrián Argüelles -flauta- y Javi Menéndez -cuerdes-, ta acabante d’asoleyar el so primer trabayu discográficu homónimu en toles plataformes dixitales. Trátase d’un EP de cinco temes nel que reellaboren melodíes tradicionales y axunten composiciones propies, grabáu y producíu por Senén Fernández nos Estudios 15:40 de Perdones (Gozón). Anque nun va salir en formatu físicu, yá pue mercase na tienda online de Musicasturiana.com una descarga dixital qu’inclúi los audios a máxima calidá, portada y contraportada -con diseñu d’Álex Villar-, testu de presentación, agradecimientos y semeyes feches por Lucía Garó.
El discu entama con ‘Barro‘, un set de muñeires ente les que puede sentise ‘Cachos’ -una composición de Javi- y la so versión de ‘Nun hai carretera ensin barru’, cola collaboración de Dani Álvarez al bodhrán y unes llinies de baxu de Senén Fernández, el primer tema que publicaron. ‘Mandilón‘, ‘Media Vuelta‘, ‘Al Molín‘ y ‘Herrumbre‘ -tamién con Dani Álvarez- completen esti EP que mira al folk dende perspectives estremaes, con atmósferes seles que contrasten con pieces enérxiques y rítmiques, y nel qu’hai espaciu pa melodíes tradicionales de les tres fasteres del país.
Anque la so idea orixinal yera un set de flauta, vigulín, bouzouki, mandolina y guitarra, nel reportaxe que Musicasturiana.com dedicó al so llabor de post-producción nel estudiu va dellos meses desplicaron que «l’atmósfera creativa del procesu» empobinólos a amestar otros elementos p’arriquecer les sos igües. Xueguen coles testures y estructures, intercambios de función ente’l vigulín y la flauta, maneres diverses de preparar les modulaciones y les transiciones ente pieces, y detalles cuasique d’orfebrería como la llinia de mandolina que suena na parte central de ‘Barro’.
L’entamu d’entós foi va dellos años col envís d’esfrutar tocando xuntos. Sicasí, quixeron da-y forma al proyectu y «intentar ser un eslabón más de la cadena de tresmisión de la música asturiana na so xeneración», como ellos mesmos comenten, buscando dexar la so buelga propia. Tán apostando, amás, pola autoxestión, preparando cada parte del so proyectu artesanalmente y con procuru. El so primer conciertu foi n’ochobre en Cervera de Pisuerga (Palencia) y, pel momentu, tienen la so primer fecha confirmada pa estrenar el so trabayu nel Festival Folkomillas de Cantabria, el domingu 22 de xunu. Cola compra dixital d’esti EP pue accecedese a más información esclusiva sobre’l procesu qu’hai detrás, retalinos de la so historia, les pieces que componen esti trabayu discográficu y muncho más.
Semeya de portada de Lucía Garó
Suscríbite a les nuestres novedaes
