Esti sábadu 12 d’abril finó a los 66 años Alberto Toyos, ún de los más históricos periodistes musicales d’Asturies. Dende neñu tuvo pasión pola radio -so pá yera Jesús Toyos Gallinal, director de Radio Asturias– y yá a finales de 1979 entamó a ser llocutor de los 40 Principales n’Asturies, emisora de la que sería director. Amás d’esto, entamó una montonera d’iniciatives pa sofitar la escena musical llocal: creó’l concursu de maquetes de Radio Asturias, el programa Derrame Rock, impulsó los premios AMAS y nos últimos años taba al frente d’El Scanner, espaciu dedicáu a la música más emerxente d’equí.
Cola so repentina muerte, marcha una de les figures clave del periodismu musical n’Asturies. La so despidida va facese esti llunes 14 a les 13h na capieya del Tanatoriu Los Arenales, n’Uviéu. Dende MUSICASTURIANA.COM llamentamos la perda d’una persona dinámica, cercana y que fizo un llabor perimportante pa sofitar, visibilizar y facer qu’espoxigara la música d’Asturies.
Suscríbite a les nuestres novedaes
