Musicasturiana.com participa nel BIME, alcuentru de la industria musical

Del 26 al 29 d’ochobre cellebrase en Bilbao el BIME PRO 2022, ún de los eventos más destacaos de la industria musical que se fai nel Estáu español -na edición de 2021 participaron 3.500 profesionales de 45 países, 1.450 empreses, 250 ponentes y hubo 105 conferencies-. Musicasturiana.com va participar esti añu nel eventu pa medrar en conocimientos rellacionaos cola industria musical gracies a les distintes charres, conferencies y talleres; pa visibilizar la música del país y crear oportunidaes de negociu con otros axentes culturales; y pa conocer les polítiques musicales que tán desendolcando distintes alministraciones públiques.

El BIME PRO ye un alcuentru internacional de la Industria Musical que se fai dende 2013 en Bilbao y, dende 2022, tamién en Botogá (Colombia). Ye ún de los alcuentros musicales más importantes de la industria musical del Estáu español, con miles d’asistentes de tol mundu y nel qu’hai ponencies, formación, conciertos, esposiciones profesionales, alcuerdos de negociu, etc.

L’Agencia Andaluza de Instituciones Culturales; Basque Music -marca pa la internacionalización de la música vasca-; Catalan Arts -marca pa la esportación de les artes catalanes dependiente del Institutu Catalán d’Empreses Culturales-; y Valencian Music Office -plataforma de visibilización, difusión y dinamización de la industria musical valenciana-, son dalgunes de les entidaes públiques dependientes de les sos respectives conseyereríes de Cultura que van tar presentes nel eventu y coles que Musicasturiana.com quier caltener contactos pa deprender d’unos exemplos d’estes polítiques musicales. Amás, va haber representación d’otres entidaes asemeyaes provenientes de países como Alemaña, Chile, Arxentina o los Países Baxos que van citase hasta’l 29 d’ochobre nel Palacio Euskalduna de Bilbao.

Pa poder participar nel BIME PRO 2022 Mecigaya Creativa SL -empresa qu’alministra Musicasturiana.com- recibió una subvención de la Conseyería de Cultura, Política Llingüística y Turismu dientro de les ayudes a profesionales y empreses pa la formación y profesionalización el sector cultural asturiano,,

Actividá subvencionada por

Dexa un comentariu

X