Rodrigo Cuevas, l’artista y axitador folclóricu asturianu más conocíu fuera de les nuestres fronteres, ta acabante d’asoleyar un cantar xunto al dúu Caamaño&Ameixeiras. Trátase d’un pasodoble en gallego nomáu ‘Catro cousas‘ que yá ta disponible en toles plataformes musicales, acompañáu d’un videoclip dirixíu por Jorge Rojas. Sabela Caamaño -curdión diatónicu- y Antía Ameixeiras -vigulín y voz- formen ún de los grupos emerxentes más reconocíos de la música de raigañu gallega. Publicaron el so últimu álbum en 2023, Quitar o aire.
Esta collaboración súmase a otres recientes del artista afincáu en Piloña. En setiembre d’esti añu, andechó na composición y interpretación del single ‘TUCUCU‘ col grupu burgalés el nido, un cantar qu’invita a baillar y bebe del funk, les sonoridaes árabes y el folclor castellán. Poco dempués, n’ochobre, sorprendió cola cumbia ‘Los Mandamientos de Amor‘ xunto a la perconocía artista y productora mexicana Lila Downs.
Suscríbite a les nuestres novedaes
