Rubén Bada da detalles del so discu en solitario, que presenta con un conciertu en La Benéfica

Rubén Bada ye ún de los músicos profesionales con más sonadía d’Asturies. Multiinstrumentista; componente de milenta proyectos; collaborador habitual con músicos d’Irlanda, Escocia, Bretaña, Galicia… Esti 2025 cumple 30 años enriba los escenarios y va festexalo editando’l so primer discu en solitario. El 26 de setiembre a les 20h La Benéfica de Piloña va acoyer el conciertu presentación pal que yá tán a la venta les entraes.

Esti discu plantégase como un trípticu onde cada estaya representa trés formes distintes na so forma d’entender la música. Per un llau son cantares tradicionales; pel otru, melodíes interpretaes col vigulín recuperando l’estilu de los vigulineros tradicionales asturianos; y, por último, una parte de guitarra solista na que s’adapten temes populares a esti instrumentu recién na tradición sonora d’Asturies, pero fundamental a la hora d’entender la reellaboración de la música de raigañu na actualidá. D’esta manera, l’álbum va recoyer xotes, muñeres, xiraldilles, llixeros, cantares de chigre y otros sones venceyaos a la música’l país.

El trabayu ye en solitario, pero non en soledá. Bada lleva trés décades trabayando xunto a con milenta músicos y nesti discu tamién hai collaboraciones de dalgunos músicos bien cercanos a él: Pepín de Muñalén a les flautes, Leticia Baselgas y Rodrigo Joglar a les percusiones. Destaca tamién el papel que tuvo Elías García, que foi parte fundamental d’esti proyectu nel so entamu y dexó dos temes grabaos enantes de la so prematura muerte. Pal conciertu de La Benéfica, amás de Muñalén, tamién va tocar Juanjo Díaz a les percusiones.

Trenta años de camín

Coincidiendo col conciertu presentación del 26 de setiembre, Rubén Bada va editar esti trabayu en formatu CD y tamién va asoleyalu en dalgunes plataformes de streaming como Bandcamp. Como comenta l’artista, el discu «condensa les esperiencies acumulaes nesti viaxe a traviés de la música tradicional asturiana». Un viaxe que lo llevó a formar parte de creaciones musicales como’l Celtic Odyssey del Festival Intercéltico de Lorient, del Celtic Connections de Glasgow y otros festivales del Arcu Atlánticu. Too ello ensin escaecer el so llabor n’Asturies -como músicu d’estudiu, de directu, productor y arreglista- que lu llevó a collaborar cola mayor parte de los artistes de la escena tradicional.