San Félix entama a cellebrar el so 40 aniversariu con un Bailla na Plaza Solidariu en Candás
El sábadu 11 de febreru, el Grupu de Baille Tradicional San Félix va entamar los actos del so 40 aniversariu cola cellebración d’un baille solidariu en collaboración cola Fundación Bancu d’Alimentos d’Asturies. La cita va ser na antigua Fábrica d’Ortiz, y dende les 19.00 van actuar nel escenario nomes mui destacaos de la música tradicional como como Abéu, L-R, 6 Riales, Herbamora, Eva Tejedor y Les Pandereteres, GF Trebeyu, AC Escontra’l Raigañu y el GB San Félix. Los grupos van amosar bailles y dances tradicionales d’Asturies pa quien quiera echar unos bailles o senciellamente disfrutar de la música.
La manera de collaborar col Bancu d’Alimentos ye a traviés de la barraca que va habilitase o de les buchaques que van tar allugaes pela sala. Trátase d’una manera bien guapa d’inaugurar los actos que’l Grupu de Baille San Félix tien preparaos pa esti añu nel que cumple cuatro décades y que van dir anunciándose nes sos redes sociales.
