Deira llanza’l so primer discu, ‘Alba’, que van presentar esti sábadu nel Celtic Connections

Deira, el tríu de folk formáu pol xixonés Gonzalo Llao (bouzouki) y los andaluces Juan Almaraz (flauta) y Salvador Daza (vigulín), asoleya’l so primer discu: Alba. N’él, el grupu reflexa toles esperiencies que vivió durante la xira qu’entamaron tres ganar el concursu The Battle of the Folk Bands nel Celtic Connections en 2022, convirtiéndose asina nel primer grupu non escocés qu’algamó’l primer puestu. El CD yá ta a la venta na tienda online de musicasturiana.com.

El nome del discu axunta varios significaos, como comenta’l grupu: «Alborecer en castellanu y n’asturianu, y Escocia en gaélicu». Asina reflexen tolo que representa Escocia pa ellos y la rellación que guarden con Asturies, tocando siempre dalgún set con pieces de grupos folk asturianos. Como comenten nos conciertos, Glasgow foi una ciudá onde’l proyectu, yá con unos años de camín, alboreció realmente tres de ganar el concursu. El tríu entamó a tocar en 2019, cuando fueron contrataos como grupu residente pa la carpa d’Asturies del Intercélticu de Lorient. Los tres músicos, con formación de conservatoriu y esperiencia previa n’otros proyectos averaos al folk, xuntáronse durante l’andanciu pa grabar una maqueta cola que consiguieron premios en concursos y sobre too abrise camín tocando en festivales per tola península ibérica y n’Escocia, compartiendo escenariu con bandes como Shooglenifty, Gatehouse o Rura

Alba ufre, según el grupu «un soníu modernu a traviés de composiciones propies na so mayoría, anque teniendo siempre presente’l folk asturianu y escocés». El discu foi producíu polos propios componentes de la banda, cuntando col trabayu d‘Héctor Pérez, d’Estudios Mundo Sinfónico (Sevilla), nos mandos técnicos. Tien les collaboraciones d’Anxo Lorenzo (gaita; Galicia), César Pastor (uilleann pipes; Madrid), Ciarán Ryan (banjo; Escocia), Pablo Vergara (bodrhán; Galicia) y Pedro Santiago ‘Pintu’ (caxón, Asturies).

Presentación nel Celtic Conections

El conciertu de presentación (l’oficial, pues yá ficieron una presentación previa en Sevilla) va tener llugar nel prestixosu festival Celtic Connections de Glasgow esti sábadu 4 de febreru a les 20.00 hores nel Glasgow Royal Concert Hall, onde tamién va tocar esa misma tarde’l gaiteru escocés James Duncan Mackenzie.