Yá ta a la venta ElKalendariu de 2023: ‘Ultramarinos LaKadarma’
Yá ta na cai el nuevu Kalendariu de la LaKadarma. La banda gaites asoleya’l so tradicional almanaque, que nesta ocasión entitúlase ‘Ultramarinos LaKadarma‘ y que recrea dalgunos cartelos icónicos de la publicidá n’Asturies, sirviéndose de los sos componentes pa facelo y da-y esi toque kadármicu. Asina presenten dende la banda gaites esti calendariu que yá ta a la venta por 14 euros (y col Kalendariu de 2019 de regalu) na tienda online de musicasturiana.com
Doce anuncios, doce meses. Anuncios como’l del papel de fumar de La Panoya, el de Chocolates Coto, mantega Arias, cerveza Águila Negra o lleche de LAGISA son dalgunos de los que conformen esti calendariu, nel que la portada presenta a un engalanáu Julio Rodríguez (Draque, Llan de Cubel y miembru de LaKadarma) ufriendo la botella d’Anís de la Asturiana.
Ye un almanaque, como davezu, compuestu por 7 fueyes peles dos cares, con 2 semeyes por cada anunciu, una miniatura del orixinal y la versión recreada polos componentes en mayor tamañu. Inclúi los meses en grande y los sos recuadros p’apuntar l’axenda y los planes de caún. Amiesta tamién el calendariu llunar, la transición de les estaciones, los cambios d’horariu y munches fiestes y efemérides.
