Esta selmana Asturies celebra la XLVII Selmana de les Lletres Asturianes y, d’ente toles actividaes programaes, destaca l’estrenu de Duces suaños: un musical pal sieglu XXI, cola dramaturxa y dirección de Laura Iglesia. La música va ponela’l Coru de les Novicies de la Orde de Cuarta Pregunta, que dirixe Mapi Quintana. Falamos cola artista l.leniza pa conocer de primer mano qué ye lo que va poder vese nesta obra que namás va interpretase esti miércoles 6 de mayu a les 20.30h na Ilesia de La Llaboral.
¿Cómo surdió’l proyectu?
Yo dirixo’l coru Asturias Gospel Experience, que ye parte d’una rede de coros gospel que tien sede n’Ibiza, pero qu’engloba a coros de toa España y a un par d’ellos d’Italia. El responsable de la rede, Joan, llamóme a mí y díxome que si quería ser la directora del coru gospel. Yo comenté-y que nun tenía esperiencia en coros gospel, peri sí en coros d’otru calter, y en facer arreglos pa coros, asina que la cosa foi palante.
Entamamos en 2024 y ta formáu por xente amateur dafechu; hai quien nun cantara enantes na so vida en público, polo que ye una cosa más social que musical. Les igües fáigoles yo, pola propia idisincracia del grupu, porque hai xente que nun llee música, entós hai qu’adaptalo a toles persones, que son 39 muyeres y dos paisanos, con unes unes edaes ente los ventipico y los setenta y pico años.
Ente les participantes ta Laura Iglesia, que ye una de les socies fundadores d’Higiénico Papel Teatro y que s’encarga esti añu, xunto a Adolfo Camilo Díaz, de la organización y programación de la Selmana de les Lletres Asturianes dedicada a la monxa Taresa Cónsul, autora de la primer obra de teatro escrita por una muyer que s’editó o que se topó.
Entós Laura pensó que yera una buena idea que’l coru formara parte d’ún de los eventos de la Selmana de les Lletres. Propúnxolnoslo. a tol mundu entusiasmó-y y ficimos una adaptación al asturianu de los temes que cantamos.
«Convertimos al coru Asturias Gospel Experience nel Coru de les Novicies de la Orde de Cuarta Pregunta, que ta formáu por 39 muyeres y dos paisanos, con unes unes edaes ente los ventipico y los setenta y pico años»
¿Cuál ye l’argumentu del musical?
Ye una historia inventada por Laura de la vida de Taresa Cónsul, como qu’escribe una carta a la so hermana cuntando-y cómo ta ella nel conventu y va filando’l tema de manera que les canciones van entrar na obra. Entós, ¿ye un musical? bueno, hai una actriz, que ye Cris Puertas, y hai música; entós tien elementos d’ello.
«Ye una historia que namás vamos interpretar esta vegada y que ta inventada por Laura Iglesia al rodiu la vida de Taresa Cónsul, como qu’escribe una carta a la so hermana cuntando-y cómo ta ella nel conventu y va filando’l tema de manera que les canciones van entrar na obra»
¿Qué temes vais interpretar?
Los temes que vamos cantar son ‘Baxo Presión’ (‘Under Pressure’ de David Bowie); ‘Duces Suaños’ (‘Sweet Dreams’ de Eurythmics y ‘Seven Nation Army’ de The White Stripes); ‘Soi pan, soi paz, soi más’ de Mercedes Sosa y un cantar gospel que se llama ‘Amén’ y nós ficimos-y una lletra n’asturianu a cuentu, ‘Amén/Xorrecer’. De primeres yera too un poco chocante, pero a la fin quedó mui bien. Tien sentíu, porque pa mí topamos la manera de poder comunicar too esto n’asturianu.
¿Vais siguir dando actuaciones n’asturianu?
Esti coro va a actuar n’asturianu esta vegada namás col nome de Coru de les Novicies de la Orde de Cuarta Pregunta, que-y lo pusimos un poco de rises por pone-y un nome rellacionao cola historia d’esta obra que dura unos 50 minutos, y llueu yá volvemos a interpretar los cantares habituales que tenemos. Somos amás un coru que nun facemos actuaciones per ehí; namás cantamos na Gala Pola Salú Mental qu’entamó Banksyastur en Mieres, porque básicamente xuntámonos pa cantar ente nós y que la xente disfrute cantando, ensin más pretensiones.
Suscríbite a les nuestres novedaes
