«Sedría mui prestoso que Gozón se colocare nel mapa de la música folk»

Daniel Meré (1997) ye, enantes que nada, bañugueru. Lleva cuasique tola vida apegáu a una gaita y con ella tocó mientres más d’una década na Banda de Gaites de Corvera, y formando pareya cola so hermana Alicia al tambor. Nos últimos años collaboró con formaciones como la Banda Gaites Fonte Fuécara, laOrquestina La Xarangana y la Bandina La Garrapiella. Metióse dende neñu nos estudios reglaos del instrumentu, algamando’l Grau n’Enseñances Artístiques Superiores de Música na primer promoción na que s’implantaron los estudios d’Interpretación de los Instrumentos de la música tradicional y popular d’Asturies xunto a los sos compañeros Marco Antonio Guardado del Valle y Fabián Fernández Fernández. En 2023 dio’l pelotazu en TikTok versionando’l ‘Quédate’ de Quevedo y BZRP, y, anguaño, ye’l cabezaleru de la Banda Gaites Cabu Peñes.

Asoleyamos esta entrevista pa conocer dende cerca’l so percorríu na profesión, la so etapa como estudiante, el procesu d’apaición de la banda gozoniega y delles reflexones sobre’l papel del instrumentu y les polítiques culturales del so conceyu.

Diendo al entamu, ¿a qué edá garrasti la gaita per primer vez? ¿Quienes foron los tos maestros?

Entamé a tocar la gaita en Bañugues de la mano de Bras Rodrigo. Él repartiera un papel peles escueles rurales, viéronlo mis padres y apuntáronme a mí a gaita y a la mio hermana a tambor. Eso debió ser con 6 o 7 años, y dempués tuve un añu y mediu o dos tocando la flauta namás. Llueu garré una gaita d’estes que nun tienen roncón y, tres d’ello, mios padres mercáronme una gaita a El Pravianu.

A partir d’esi momentu tolo que fice foron estudios reglaos. Apuntéme a la Escuela de Música de Candás porque en Lluanco nun había gaita y, nos dos años que tuve ellí, el mio maestru foi Velu. Dempués pasé al Conservatoriu, onde me dio clase Marco Antonio Guardado, que ye, probablemente, el mayor referente porque foi la persona cola que más deprendí, col que di un saltu de calidá mesmo a nivel musical que técnicu. Iñaki Santianes, Pedro Pangua -anque fuere más n’asignatures de conxuntu-, Xuan, Diego Pangua y Xuacu Amieva tamién foron maestros míos.

«Entamé a tocar la gaita con Bras Rodrigo. Sicasí, Marco Antonio Guardado ye, probablemente, el mayor referente que tengo porque foi la persona cola que más deprendí a nivel musical y técnicu»

Averándonos un poco más nel tiempu, formasti parte de la primer promoción de titulaos superiores de gaita, ¿cómo foi abrir camín nel Conservatoriu Superior?

Recuérdolo como una etapa divertida, con munchu ciñu, anque foi dura enforma nel Departamentu de Gaita. Al final sacámoslo y deprendí muncho. Recuerdo con munchu cariñu tol restu d’asignatures nes que pudi coincidir con profesores maraviyosos colos que deprendí, más alló de la gaita, a ser un músicu.

«Recuerdo la etapa nel Conservatoriu Superior con munchu ciñu, anque foi dura enforma nel Departamentu de Gaita. Pudi coincidir con profesores maraviyosos colos que deprendí a ser un músicu»

Yá pasaron cuasique dos años y mediu dende que finasti los estudios, ¿qué valoración faes de la formación? ¿Qué coses debieren incluyise na especialidá pa que fuere más completa y interesante p’atrayer más alumnáu?

Pienso qu’hai muncho qu’ameyorar, non namás Superior sinón tol enseñu regláu de gaita, y pueo decilo yo en primer persona porque estudié dende’l Grau Elemental al Superior. Por poner un exemplu, a mí nunca m’enseñaron a acompañar tonada -que ye una parte esencial de la gaita-, nin a tocar una xota’l centru o una muñeira cola estructura pal baille, tuve que deprendelo pela mio cuenta. Hai munches carencies; cuando sales del Superior debieres ser un tou terrenu, saber tocalo too, y nun ye asina.

Sí ye verdá que deprendes muncha música. Por exemplu, tando ellí, Jorge Carrillo compuso la primer obra electroacústica pa gaita que, dende’l mio puntu de vista foi un avance. Ye un tarrén nel que la gaita nunca nun tuviera y pienso que ye interesante afondar nello, anque nun seya música popular. Nel casu del Superior, habría d’introducise más música asturiana y tradicional, amás d’esplorar cola gaita na orquesta -porque hai obres, pero podía haber más-, y nel repertoriu con pianu.

«Tando nel Conservatoriu, Jorge Carrillo compuso la primer obra electroacústica pa gaita. Ye un tarrén nel que la gaita nunca nun tuviera y pienso que ye interesante afondar nello»

Una de les reivindicaciones que más ta sonando y qu’amás apuntó Pedro Pangua l’otru día nel Congresu Mundial de Cultura Asturiana ye la necesidá de que les instituciones dean el mesmu valir a toles músiques y creen una formación análoga a la OSPA, ¿cómo valores esta propuesta? ¿Crees que va poder facese realidá dalgún día?

Oxalá, pero nun pinta bien. Toi d’alcuerdu dafechu con Pedro Pangua; él ye ún de los mayores impulsores de la gaita nel conservatoriu y yo probablemente nun taría equí de nun ser por tolo que llucharon mesmo él qu’otros gaiteros. Pienso qu’habría metese la gaita n’otros ámbitos. Dende que salimos del CONSMUPA, por exemplu, esperaba que la OSPA apostara por meter la gaita nos sos conciertos. Sé que faen un conciertu especial al añu de compositores asturianos, pero nos dos o tres años que llevamos yá cola titulación, incluso contando los cuatro nos que yá tábemos estudiando, nun se fizo nada cola gaita. Podríen impulsar de dalguna manera la composición d’obres con instrumentos tradicionales entamando, por poner, un concursu de composición.

Sobre’l tema de facer una banda gaites que represente a Asturies, pienso que ye necesario. Fai falta una banda que prepare un repertoriu a la selmana o al mes y que faga conciertos per toa Asturies. Pue facese porque hai los recursos necesarios, sobre too los recursos humanos, dende directores con formación en gaita hasta compositores. Yá nun hai escusa, tienen que ponese les piles.

«Ye necesario facer una banda gaites que represente a Asturies que prepare un repertoriu a la selmana o al mes y que faga conciertos per tol territoriu»

Cambiando de torna, una de les espresiones del mundu de la gaita n’Asturies son los concursos, ¿qué ye lo meyor y lo peor d’ellos? ¿En cuántos participasti nos últimos años?

Lo meyor de los concursos ye conocer a xente maraviyoso. Quiero muncho a tolos gaiteros colos que concurso anguaño. La peor ye la competitividá qu’había nel pasáu, y malos rollos que nun me prestaben y ficieron que me desencantara un poco d’ellos. Nun tenemos que ser competitivos, ¿pa qué? Namás contigo mesmo: ponete un concursu como oxetivu, preparar un repertoriu y facelo bien; si sal mal, pues salióte mal, yá habrá otru concursu. Quiero animar a la xente a presentase, a que preparen un repertoriu y lo tomen como un retu personal, que se pongan nerviosos y deprendan. Foi onde más deprendí, sobre too, a poneme nel escenariu

Hebo una época, cuando’l COVID, que taba presentándome namás al «Ciudad de Oviedo» y dexé los demás. Cuando entamé a conocer a la mocedá que ta entrando nos concursos, volví a enganchame un poco. Presentéme al «Ciudad de Oviedo», al de Les Regueres -que celebró esti añu la primer edición y foi increíble, pasélo perbién-, y al concursu de Ribeseya… Tamién hai concursos que desapaecieron y ye una pena. Por exemplu, el que se facía equí en Xixón na Plaza Mayor que yera una pasada, cola plaza enllena; y el de Bimenes. Taba bien retomalos.

Nesta última edición del Festival Intercélticu de Lorient algamasti’l tercer puestu nel troféu MacCrimmon, nel que yá concursares delles veces enantes, amás de ser xuráu en 2023, ¿cómo foi formar parte d’un eventu tan destacáu pal instrumentu dende les dos perspectives?

Pasar de tar concursando a ser xuráu ye un pasu bastante más grande de lo que yo pensaba. Amás, nun yera namás la primer vez que lo facía ellí en Lorient, sinón la primer vez que me sentaba nel llau contrariu na mio vida. Púnxeme más nerviosu que tando nel escenariu, yera una responsabilidá pergrande porque’l MacCrimmon ye dalgo más qu’un concursu.

Paezme qu’en 2023 yera’l quintu añu que me presentaba y pienso qu’algamé lo máximo que puedo, esi tercer puestu. Nun sé si volveré a presentame, intentarélo probablemente, pero d’ehí a poder llegar, véolo complicao. Pa mí ye un arguyu llegar ellí y dicir que soi de Bañugues, de Gozón, porque nun hai muncha cultura de gaita nel conceyu. La xente valóralo bastante y toi percontentu per esa parte.

«Pa mí ye un arguyu llegar a Lorient y dicir que soi de Bañugues, de Gozón, porque nun hai muncha cultura de gaita nel conceyu»

Tamién en 2023, asoleyasti’l to primer videu en TikTok interpretando cola gaita melodíes perconocíes de la música mainstream, ¿d’ónde te vieno la idea?

La idea surdió un día que la mio moza pasóme un videu d’un saxofonista tocando ‘Quédate’ nel Benito Villamarín -l’Estadiu del Betis-. Bromeamos con qu’había pareyes que diben a vese al fútbol y yo-y dixe: vas venir a veme a El Molinón. Yo yá tocaba canciones pela mio cuenta ensin grabales o cuando taba de folixa, como’l ‘Despacito’-, y pasábamoslo bien. Entós, col ‘Quédate’, vi que quedaba bien poner la base y tocar cola gaita per enriba y animéme a xubilo a TikTok, que yera una red que yo nun utilizaba hasta esi momentu. Polo que vi, yera bastante fácil que los vídeos se viralizasen y yá tenía esa intención de saber qué pasaba si xubía’l videu esi. Viralizóse per TikTok y WhatsApp y, ente una cosa y otra, gracies a esi videu, zarré la boca a la mio moza y toqué n’El Molinón.

Dempués fízose un poco bola del ‘Quédate’. A la selmana siguiente xubí ‘Despechá’ de Rosalía y masificóse un poco lo que fice. Pienso que nun tien tantu méritu. El mayor méritu ye, probablemente, como falamos enantes, la formación musical que me permite sacar les melodíes con mayor facilidá, meter la base, identificar el tonu… como si ficiere un dictáu nel conservatoriu, lo mesmo. Toi contentu porque se-y dio esposición a la gaita nun ámbitu nuevu. Llamáronme de munches entrevistes a nivel asturianu y nacional. Llegaron a llamame de Telemadrid y, amás, toqué en Got Talent. Too gracies al ‘Quédate’.

«Yo yá tocaba canciones pela mio cuenta ensin grabales o cuando taba de folixa. Entós, col ‘Quédate’, vi que quedaba bien poner la base y tocar cola gaita per enriba y animéme a xubilo a TikTok. Toi contentu porque se-y dio esposición a la gaita nun ámbitu nuevu»

Va poco, Álvaro Cueto -Melandru, BG Ribeseya, BG Camín de Fierro- reflexonó nuna entrevista pa musicasturiana.com al rodiu los estereotipos asociaos a la gaita como instrumentu tradicional que difícilmente pue salise del repertoriu y les formes d’antaño, defendendo la llibertá pa interpretar con ella xéneros nuevos, ¿cómo lo ves tu? ¿Ye lo que faes un exemplu d’ello?

Evidentemente, toi d’alcuerdu con Álvaro -que ye un gaiterazu, por cierto-. La gaita ye un instrumentu polivalente que pue amestase a munchos xéneros y creo qu’esto yá quedó bastante claro porque la vimos en munchos entornos. Hai precedentes hasta nel pop a nivel nacional y internacional con grupos como El Sueño de Morfeo. Queda de la mano de los gaiteros que tamos esperimentando col instrumentu anguaño, como fai Melandru, que me paez maraviyoso tamién.

Va poco lleí nel ensayu d’Héctor Braga que da igual que cantes bien o cantes mal, lo importante ye cantar. Esto pue aplicase, nesti sen, a la gaita: da igual el xéneru que toques, lo importante ye que lo vea la xente. Al traviés de TikTok ta llegando a muncha xente mozo, mui mozo. Recibo llamaes pidiéndome partitures, preguntándome p’apuntase a tocar la gaita… Por eso ye importante asociar la gaita a nueves idees.

Cuando fici los TikToks con cantares que pueden sonar nuna discoteca y son virales, pudi llegar a tocar n’El Molinón. Como decía Álvaro, cuando metes un instrumentu que ta tan asociáu al sieglu XX o finales del XIX nun contestu nuevu, como ye nesti casu’l deporte y un equipu de fútbol como’l Sporting, y los guah.es ven la gaita, paez que pue ser más atractivu pa eses nueves xeneraciones. Por eso ye perimportante reinventar l’instrumentu; nun pasa nada por tocar ‘Despechá’ o ‘Nochentera’, naide muerre nin nada, la historia de la gaita sigue ehí, y un guah.e qu’entame a tocar pol ‘Quédate’ va acabar tocando tamién el repertoriu tradicional. Que naide eches les manes a la cabeza.

«La gaita ye un instrumentu polivalente que pue amestase a munchos xéneros. Nun pasa nada por tocar ‘Despechá’ o ‘Nochentera’; la historia de la gaita sigue ehí y un guah.e qu’entame a tocar pol ‘Quédate’ va acabar tocando tamién el repertoriu tradicional»

Nesi sen, ¿qué perspectives de presente y futuru ties pa col to proyectu? ¿Vamos poder vete en directu?

Nun quiero agobiame col TikTok, llévame muncha carga psicolóxica y, a veces, ye duro d’aguantar. Si xubo un videu y viralízase un poco, llámame xente, tengo munchos mensaxes… Y yo soi sociable, pero non tanto. Siento que se me da más méritu del que tengo y nun me presta sentir eso. Sigo xubiendo vídeos de xemes en cuando pa pasalo bien.

Sí que me prestaría entamar dalgún proyectu y yá tengo idees. Creo qu’hai que meter la gaita en xéneros nuevos y quiero facer dalgo asina. Espero poder desendolcalo pronto porque yá tengo cosines pensaes, y dar que falar esti añu o el siguiente. Si nun triunfa, polo menos eso, dar que falar y dexalo fecho. Eses son les mios intenciones. No tocante a veme tocar en directo, nun se me va ver individualmente, pero sí que voi xubir al escenariu en dalgún momentu esti añu.

Per otru llau, en 2024 decidisti dar un pasu alantre y crear la Banda Gaites Cabu Peñes, ¿por qué? ¿Cómo ta siendo’l procesu?

La banda nun la creé yo, foi un grupu de xente que tocaba la gaita en Gozón y que queríen formar una banda. Yo fui l’enllaz de toos ellos pa dar un pasu alantre, decir que tábemos equí y que podíemos facelo.

Too esto surdió porque acabé los estudios de Superior, nun podía estudiar el máster y nun quería quedame ehí. Aventuréme a dar clases de gaita en Bañugues, a ver si apaecía dalguién. Ayudáronme la viralidá en TikTok y el currículum académicu que m’avalaba. Entamé a poner clase a guah.es y, cuando había dalgún eventu en Gozón, díbemos a tocar por pasalo bien. Decíenme que teníemos que facer una banda, xuntanos toos y llamar a otros gaiteros. Dexábalo pasar un poco porque nun taba yo pa meteme nesi fregáu, porque ye un fregáu.

A la fin, metíme porque nun taba solu, porque había más xente conmigo. Decidimos xuntanos y pedimos un llocal pa ensayar. Agora mesmo cuasi tola xente que ta na banda tán acabantes d’entamar a tocar la gaita o ye xente que lleva munchu tiempu ensin facelo. Decidí meter repertoriu cenciellu pa que se vaya viendo una llinia ascendente, que-yos resulte atractivo, motivador. Que la xente del pueblu de Gozón vea cómo vamos ameyorando. A nivel personal, paezme un retu dirixir dalgo asina.

Pienso que ye dalgo perprestoso pal conceyu porque nunca nun hebo nada asina. Hebo intentos de bandes que nun llegaron a bon puertu, entós, espero qu’esta banda cambie esi precedente. Nes proyecciones de futuru, eso, que la banda nun apare y algamar una llinia ascendente nel repertoriu, facer coses guapes… Si nun podemos facer temes con muncha dificultá, rabilar colo que tenemos y da-y vueltes.

«Agora mesmo cuasi tola xente que ta na banda tán acabantes d’entamar a tocar la gaita o lleven munchu tiempu ensin facelo. Pienso que ye dalgo perprestoso pal conceyu porque nunca nun hebo nada asina»

«Siempre concebí Gozón como una burbuya y esa burbuya hai qu’españala. Sedría mui prestoso que Gozón se colocare nel mapa de la música folk»

Pa zarrar, anque van dándose pasos nello, nel conceyu Gozón hai un vacíu grande de programación musical y cultural asturiana en comparanza con otros conceyos de la contorna como Carreño, ¿qué-y propondríes al gobiernu?

Ye verdá que’l conceyu ta cambiando enforma. Tamos viendo cómo ta abriéndose un poco más. Yo siempre concebí Gozón, a nivel personal, como una burbuya. Cuando diba a eventos como Lorient o otros eventos de música asturiana, podía llegar a saturame y, en llegando a Gozón, nun había nada. Esa burbuya hai qu’españala. Puen facese coses perguapes y pienso, amás, que’l nuestru llabor dende la banda ye puxar por ello. Espero que gracies a nosotros entame a haber una programación más abierta.

¿Qué-y pido al Gobiernu de Gozón? La verdá ye que tán ayudándonos bastante. Pel momentu, nun tenemos nenguna quexa porque podemos tocar cuando nos dea la gana, llámennos y cuenten con nós. tamos contentos, pero como siempre pue pedise más, voi facelo. Prestaríame que nos ficieren un poco más de casu si quieren preparar una programación cultural porque tenemos munches coses qu’ufrir.

Nun pue construyise too d’un día pa otru mesmo que nun pue haber mañana un festival como Lorient ellí, sedría un fracasu probablemente. La xente de Gozón nun ta avezada a ver nin una banda gaites nin un conciertu folk. Hai que facelo pasu ente pasu. Tamos nel camín correctu; d’equí nunos años igual podemos volver a venos y decir: mira lo qu’hai en Gozón anguaño y lo que falábemos en 2025 d’eses proyecciones de futuru. Sedría mui prestoso que Gozón se colocare nel mapa de la música folk. A la xente mozo cuesta-y muncho sentir música asturiana, anque tean surdiendo xéneros nuevos. Hai que reflexonar sobre cómo facer atractivos los conciertos pa reavivar esa llama.