Va xusto dos meses, el 4 de xunetu, Ochobre asoleyó’l so segundu discu, La rabia nos dientes. Nesti trabayu rescampla la evolución qu’esta formación moza de rock astur tuvo en tolos sentíos: composición musical, lletres, estética, soníu… Too ello calteniendo les sos señes d’identidá, caracterizaes por facer un soníu de base punk-rock al que-y incorporen la gaita, y tresmitir un mensaxe enllenu de compromisu pa cola xusticia social y siempre con mirada asturiana a la hora d’amosar la so visión del mundu.
Dende l’entamu de la banda ta Natalia González Menéndez, gaitera que con namás 19 años dio’l primer conciertu del «xermen» de lo que llueu sería esti grupu. N’aquel ochobre de 2014 xubió al escenariu de la sala Sir Laurens d’Uviéu dientro de los actos del Día de la Mocedá Revolucionario (DMR) qu’entamaba la organización de mocedá soberanista Darréu. Fixeron versiones d’Avientu -grupu del que’l so pá fuera gaiteru- y ellí plantóse una semiente que xorrez hasta güei. Con ella falamos de toos estos años de camín, de la escena de rock n’asturianu y del so trabayu nuevu.
Yá pasaron 11 años d’aquel conciertu míticu nel DMR. ¿Qué foi lo que vos llevó a xubir al escenariu y que vos caltién enriba d’él?
La banda que subió al escenariu aquella nueche de 2014 nun ye, en realidá, la banda que tenemos güei. Aquel foi un proyectu que per aquel entós intenté montar con Andy da Silva y otra xente qu’atopamos pel camín de la música pero que nun duró más qu’aquel conciertu. En desfaciéndose esi proyectu, Andy y yo siguíemos queriendo un grupu de punk n’asturianu, sentíemos el gusanín de querer intentar facer lo que bandes a les qu’almirábemos facíen y veíemos qu’había un güecu pa nosotros. Y, año y picu depués, atopamos a Viti, que tamién tenía ganes y una visión mui paecía a la nuestra de qu’el proyectu del que falábemos tenía cabida na escena asturiana. Él contactó con compañeros colos que yá tocara n’otres bandes y entós sí nació l’Ochobre de güei, si bien hubo dellos cambios na formación nestos años. Güei, el sentimientu que nos fizo formar esto fai 9 años, 11 si contamos aquel primer intentu, non namás sigue dientro de nosotros, sinón que se multiplicó por muncho. Y yá nun marcha.
«Malos momentos nun tuvimos, más que tener que pelear por entrar en dalgún festival o eventu que paez que namás tien cabida pa músiques en castellán o n’inglés. Pero, una vez dientro, el públicu de la nuestra escena respuende y olvídasenos que nos costó entrar un poco más qu’a los demás»
11 años dan pa muncho. ¿Cuálos son los meyores y peores momentos que recordáis?
Nun mentiría si dixera que nun recuerdo momentos malos con Ochobre. Guardamos con un cariñu inmensu toles etapes peles que pasemos. Los entamos nel Llar el Mataderu, que foi la casa de tantes y tantes bandes que queríen tocar, tocar y tocar. Daquella había meses que tocábemos dos veces nel Llar. Y de cada conciertu, anque hubiere 10 persones, guardamos anécdotes y bonos recuerdos. Disfrutamos munchísimo del underground, asina como disfrutamos munchísimo de conciertos históricos como’l del Kuivi con Skama la Rede y Dixebra nel 2022. Munches veces, si pensamos nun momentu pa escoyer de la trayectoria, recordamos aquel conciertu. Pero daquién diz dalgo d’un conciertu en La Traviesa o nel Mataderu y rápido cambiamos y sabemos que nun se pue escoyer namás unu. Por suerte, malos momentos nun tuvimos, más que tener que pelear por entrar en dalgún festival o eventu que paez que namás tien cabida pa músiques en castellán o n’inglés. Pero, una vez dientro, el públicu de la nuestra escena respuende y olvídasenos que nos costó entrar un poco más qu’a los demás.
Nesti tiempu tamién tuvistis que reformular la formación. ¿Cómo afrontastis estos cambios?
Los grupos pequeños como nosotros nun entendemos la música de nenguna manera profesional, somos grupos d’amigos y facemos música xuntos, principalmente, porque nos presta tar xuntos. Cuando dalguien marcha por motivos personales, llaborales o lo que seya, siempre ye una pena enorme. Tenemos la suerte de poder dicir que delles de les persones que pasaron per Ochobre siguen ehí d’una manera o otra. Andy da Silva, cuando nos falla nun conciertu un guitarrista o’l baxista, vien encantáu a echanos un cable. Adrián Calvillo, el primer vocalista, sigue faciéndonos les lletres… Si bien nos dio una pena infinita que marcharen, entendemos los ritmos y les necesidaes de cada persona y lo difícil que ye conciliar distintos proyectos con una vida llaboral y personal. La formación que tenemos agora, que ye post-pandémica, fainos sintir mui mui cómodos. Munches veces falamos con Charly, que foi l’últimu n’entrar, que ye como si siempre tuviere nel grupu o como si toos supiéramos que tenía qu’acabar nél. Pa nosotros ye mui importante que naveguemos nel mesmu barcu no musical, pero sobre manera ye importante que podamos dir a tomar unes cerveces y lo pasemos bien. Y en dambos sentíos tamos mui arguyosos de la formación d’anguaño. Amás, la incorporación de Miguel (baxu), Charly (guitarra) y Raquel (voz), que veníen d’otres bandes d’estilos distintos, aportó una riqueza na composición y una frescura d’idees que foi imprescindible nesti camín de tresformación musical.
‘¡Autodefensa, Muyer!’ foi la primer materialización d’estos cambios. Tou un puntu d’inflexón na vuestra trayectoria.
Cuando pensamos na trayectoria d’Ochobre, pensamos en trés discos, en llugar d’en dos, jajaja. ‘¡Autodefensa, muyer’ tuvo un partu cuasi tan llargu como La rabia nos dientes. Con esi cantar que remocicamos y ameyoramos durante meses, renovamos imaxe, ficimos el primer videoclip, cambiamos el llogu, ficimos merchan específicu… Cuando esi trabayu de tantu tiempu salió a la lluz, supimos qu’esti yera’l camín. Agora sí, el camín foi llentu.
«Bien entráu’l 2024, decidimos entamar a descartar y planteganos en serio facer un discu nel que nos sintiéremos arguyosos de tolos temes, nun queríemos tener trés top y rellenar con canciones que nin fu nin fa»
Tamién foi la semiente d’esti discu, que foi xorreciendo a lo llargo 4 años. ¿Cómo foi’l procesu de grabación y por qué s’allargó tanto?
Ochobre somos siete persones. Siete persones con curros mui distintos, incluyendo dende trés turnos de llunes a domingu, a daquién siempre de tardes, otru siempre de mañanes… Intentar sacar palantre un proyectu personal con toos esos factores nun ye fácil. Yo, por exemplu, llancé un proyectu llaboral nel 2023 que me fizo tar un añu y mediu completamente ausente, pasando pel llocal d’ensayu menos de diez veces en tou esi tiempu. Les coses que se diben faciendo diben despacio. Y al pasar tantu tiempu, nosotros mesmos cambiamos, y de repente canciones que llevaben feches trés años y que tocábemos en directo, sentíemos que nun taben al altor d’otres más recientes, más complexes, más potentes. Entós, allá bien entráu’l 2024, decidimos entamar a descartar y planteganos en serio facer un discu nel que nos sintiéremos arguyosos de tolos temes, nun queríemos tener trés top y rellenar con canciones que nin fu nin fa. Entós ye cuando entama un procesu de composición más seriu y cuando nosotros somos más estrictos con nosotros mesmos. Si tardáremos tanto en sacar un discu, queríemos que fuera «el discu».
Nun dexa de llamame l’atención que nestos tiempos d’inmediatez y rapidez, los grupos d’Asturies cada vez tarden más tiempu en sacar material nuevu…
Na escena que nos atañe, que suel incorporar instrumentos tradicionales o vientos metales, solemos ser un puñáu de xente en toles bandes. Nenguna de les bandes del rock n’asturianu correspuende al modelu de banda clásica del punk de guitarra, baxu, voz y batería. Y cuando nun te dediques profesionalmente a esto, xuntar a 6, 7 persones toles semanes a dedica-y hores ye mui complexo. Nun creo que vayamos a la escontra de los tiempos que cuerren, pero ye que tenemos que comer.
«Nenguna de les bandes del rock n’asturianu correspuende al modelu de banda clásica del punk de guitarra, baxu, voz y batería. Y cuando nun te dediques profesionalmente a esto, xuntar a 6, 7 persones toles semanes a dedica-y hores ye mui complexo. Nun creo que vayamos a la escontra de los tiempos que cuerren, pero ye que tenemos que comer»
La rabia nos dientes amuesa una evolución clara no musical. ¿Cómo definís el discu nesti sen y cómo valoráis el resultáu a nivel compositivu?
Esti discu salse radicalmente del punk-rock senciellu que veníemos faciendo y entama a beber d’otros estilos. Creemos que La rabia nos dientes suena a ratos a punk melódicu, más americanu, a ratos a hardcore, n’ocasiones cuélase’l metal… Esta bayura d’influencies y el fechu de romper coles estructures más canóniques de les canciones del punk, creemos que ye’l resultáu del discu. Tol mundu que lu siente destaca’l soníu nuevu y les canciones más ellaboraes, con partes mui contrastaes dientro d’un mesmu tema. Si la xente lo ve, oxetivu conseguíu. A nosotros gustónos muncho esi resultáu.
Si vos tenéis que quedar con un tema. ¿Con cuál sería y por qué?
Creo que toos nos quedaríemos con ‘Puxarra’. Ye una canción mui rara a nivel estructural, cuasi obsesiva con tanta repetición d’un estribillu mui melódicu, pero que tresmite muncha fuercia. Tanto na lletra como no musical, ye’l reflexu de la rabia que vertebra’l discu.
«Creemos que ‘La rabia nos dientes‘ suena a ratos a punk melódicu, más americanu, a ratos a hardcore, n’ocasiones cuélase’l metal… Esta bayura d’influencies y el fechu de romper coles estructures más canóniques de les canciones del punk, creemos que ye’l resultáu del discu»
Sois herencia del rock astur, pero pue llamar l’atención que nun collaboró con vos nengún de los nomes míticos d’esta escena. Hai una collaboración namás y escoyistis la de Pitxe, lo qu’amuesa una intencionalidá nidia.
Pa nosotros Pitxe ye toa una figura de referencia, foi una de les miembres fundadores de bandes qu’admiramos y a les que seguimos nel camín, como Skontra o Brutus’ Daughters. Qu’exista n’Asturies, y más concretamente na escena n’asturianu, una figura femenina con tantu talentu y tantu remangu como tien ella, faila collaboradora indispensable pa esti proyectu. ¿Por qué nun ficimos más collaboraciones? Diríate que por nun allargar la grabación otru añu más, hahaha. Sicasí, tenemos la suerte de que nos nuestros directos son collaboradores habituales munchos d’esos nomes míticos que suxeres: Burilo (Skama la Rede), Xandru (Skama la Rede), Berto (Skontra), Pastrana (Skontra), Nieto (Sartenazo Cerebral), etc…
Paez amás qu’esta escena entró en retrocesu. Nun hai grupos nuevos y esti branu hubo mui pocos conciertos del estilu.
Nosotros pensamos que sí hai escena y que sí hai circuitu pa ella n’Asturies. Dende oriente a occidente hai festivales d’estilos estremaos nos qu’entra’l rock n’asturianu, dende la Noite Celta de Porcía al Maízu Rock, pasando peles fiestes de Baiña, el FIG o’l festival de la cerveza de Morcín. Y en toos esos conciertos hai un públicu superfiel. Lo que sí qu’hai menos son grupos de rock. Y ye que nun ye fácil, nin barato, montar una banda. La estabilidá económica que teníen los mozos que con mio pá formaron Avientu nos años 90, nun la tienen agora unos neños de 18 años que tengan que pagar un llocal d’ensayu, gasolina, coches, cuerdes, baquetes, amplis, etc. Hai xente mozo nos nuestros conciertos. Hai xente mozo nel Viñarock.
Hai xente mozo nel Hatortxu Rock, onde tuvi va dos meses y la media d’edá foi ún de los factores que más me llamó l’atención. Sí que siente rock la xente mozo, caemos munches veces nel error de pensar que la masa ye homoxénea y por suerte ye bien diversa. Pero falten munches veces espacios pa ensayar, espacios pa entamar a tocar -¿ónde taríemos nosotros si nun hubiéremos tenío’l Mataderu, que yá nun ta? ¿quién cumple agora n’Asturies el so llabor?-, y una mínima estabilidá económica pa poder permitite un hobby que nun ye necesariamente baratu. N’otres músiques más urbanes pues facer música na to casa con un ordenador y llegar a munchísima xente. Lo nuestro, munches veces, resúmese na carretera.
«¿Ónde taríemos nosotros si nun hubiéremos tenío’l Mataderu, que yá nun ta? ¿Quién cumple agora n’Asturies el so llabor?»
Per otru llau, nel folk hai un resurdimientu con grupos mozos nuevos y tamién van naciendo otres escenes más electróniques y urbanes. ¿Por qué creeis que nestos otros estilos ta dándose dalgo que nel rock non?
Tamos viendo un auxe d’estes músiques a nivel internacional y ye normal: ye’l so tiempu. Incluso nel folk tamos viendo que nesi resurdimientu cuélase davezu lo electrónico, ritmos más bailables, que s’allueñen, en xeneral, del folk clásicu. Y ye que ye normal. Facemos música dende 2025, somos fíes y fíos del nuestru tiempu y escuchamos coses mui diverses que pasen per nosotros y dexen buelga. Tampoco creo que nosotros, na nuestra escena del punk, teamos reproduciendo lo que se facía nel rock radical vascu, por muncho que nos preste o que seya una influencia importante pa nosotros. Sicasí, como te decía antes, creo que’l factor económicu y la falta de sales, llocales d’ensayu y espacios más underground, perxudica necesariamente más a una banda de varies persones qu’a otros formatos musicales.
Volviendo al discu. Les lletres caltienen el compromisu social. Hai milenta causes a les que cantar. ¿Tenéis clares les temátiques que queréis tratar o van surdiendo de forma improvisada? Amás, Adrián Calvillo ye’l lletrista, ¿Cómo xestionáis esta collaboración agora que nun ye miembru activu de la banda?
Periódicamente, Adri mándanos un puñáu de lletres, siempre de tinte social y que traten temes que siempre definieron el discursu d’Ochobre. Entós tenemos un Drive del grupu con esi bancu de lletres del que vamos tirando cuando surde una canción nueva. En dalguna ocasión, esa nueva idea suena más sentimental, nun-y pega una lletra quiciabes tan «rabiosa» (o al contrario) y entós tenemos que facer dalguna nosotros. Foi esti’l casu de ‘Escuela d’amor’, ‘Los nadies’ o ‘Autodefensa, muyer’. Nel restu de temes siempre nos encaxaron y encantaron les lletres d’Adri y esperamos que nos siga faciendo munches más.
«Pablo Viña ye l’octavu miembru d’esta banda. Acompañónos dende l’entamu y nun fizo namás un llabor de grabanos, sinón que tolos temes que podéis sentir tán infinitamente ameyoraos por él, poles sos idees y aportaciones»
A diferencia d’otres bandes del rock astur, el discu ta grabáu con Pablo Viña nos sos estudios. ¿Por qué?
Pablo Viña ye l’octavu miembru d’esta banda. Acompañónos dende l’entamu y nun fizo namás un llabor de grabanos, sinón que tolos temes que podéis sentir tán infinitamente ameyoraos por él, poles sos idees y aportaciones. Nun concebíemos grabar esti discu con naide que nun fuere él, ya que lleva años apoyando esti proyectu pa que salga alantre. Préstanos pensar que non solo lu sentimos nosotros como unu más de la banda, sinón qu’él tamién siente Ochobre como un proyectu un poco suyu.
Otra de les característiques ye que-y dais más pesu a la estética a traviés del diseñu y les semeyes.
Queríemos que la evolución musical fuere acompañada d’una renovación d’imaxe. Tol arte del discu ye obra de Iago Datriga y nin nos nuestros meyores suaños imaxináremos unos diseños tan preciosos. Tol mundu ta valorándolo munchísimo y tamos mui arguyosos d’escoyer trabayar esti discu con él. En cuanto a les semeyes, llevábemos tantos años ensin actualizales que nun taba nin Charly, que lleva cuatro años na banda. Si somos un desastre, somos un desastre pa too. Pero iguámoslo con esta sesión fecha por Java na antigua Fábrica de Loza de San Claudio.
La rabia nos dientes yá tien dos meses. ¿Cómo tán diendo los conciertos de presentación y cuálos son los próximos?
Tuvimos ocasión de tocar dos vegaes esti veranu y el recibimientu foi superemocionante pa nosotros. Nel primer conciertu en L’Infiestu tol mundu sabía yá les lletres y acabábemos d’asoleyales prácticamente, y nel segundu nel Rockvera agotamos tol merchan. Son sensaciones mui positives y gratificantes. Per delantre esti añu tenemos un conciertu en San Mateo el 18 setiembre, otru en Reinosa’l 27, el festival de la cerveza de Morcín el 11 d’ochobre y la que va ser la presentación oficial del discu, con collaboraciones especiales, el 15 de payares na sala Gong d’Uviéu, onde vamos tar acompañaos por Entretiempo, una banda amiga de ska-punk de Madrid.
Una de les vuestres asignatures pendientes quiciabes seya la de salir más a tocar fuera d’Asturies. Los grupos más veteranos d’esta escena si que salieron más a tocar, pero agora paez que ye más complicáu tocar fuera en xeneral…
Creo que vivimos un momentu d’auxe pa les músiques feches en llingües minorizaes. Crim toca per toa Europa cantando en catalán; Tanxugueiras toca nel Viña Rock non pol estilu, sinón pol idioma; Dakidarría canta en gallego per tolos festivales del estáu; grupos n’euskera suenen n’América Latina… Que nun salgamos muncho d’Asturies nun ye por nengún tipu de rechazu a la nuestra escena, al contrario: cantar n’asturianu siempre nos abrió puertes. El problema ye’l de siempre, la incompatibilidá llaboral con unes esixencies que nun solemos poder cumplir… De toles formes, l’oxetivu del añu que vien, amás de dalgún festi ya confirmáu fuera d’Asturies, ye facer l’esfuerciu y salir a dellos destinos a los que yá teníemos qu’haber dío y qu’hasta agora nun pudimos llograr, como Barcelona o Euskal Herria. Eso y facer un conciertu asturianista con Skama la Rede en Madrid, pa la diáspora, y llevar en conxuntu esti discu y el d’ellos que ta a piques de salir. Pero dannos llargues, jajaja. Vamos a presionalos tamién per equí.
«Si nun tamos dafechu nel circuitu estatal, ye polo que vengo diciendo. Polo mesmo que tardamos en grabar el discu. Porque da la casualidá que les poques bandes que tamos faciendo esto, nun nos podemos dedicar nin semiprofesionalmente a ello. Y eso, evidentemente, fai mella. Pero xente buscando coses distintes, músiques distintes, llingües distintes, hailes por suerte en tolos llaos»
Vos amás soléis dir como públicu a festivales y tenéis tratu con más bandes punk-rock del Estáu. ¿Qué grau de conocimientu hai d’Asturies y d’esta escena acullá de les nuestres llendes?
Si nos fiamos de Spotify, el llugar onde más s’escucha Ochobre ye en Madrid. La xente que nos conoz de la escena estatal siempre fala del potencial. Siéntese la música fecha n’asturianu, ye un fechu. Misiva sonó munchísimo nel Estáu. Skontra suena munchísimo nel Estáu. Miles de persones cantando nel Wizink Center los temes n’asturianu de Desakato ye una victoria pa la nuestra escena. Pero si nun tamos dafechu nel circuitu estatal, ye polo que vengo diciendo. Polo mesmo que tardamos en grabar el discu nosotros o Skontra o Skama la Rede. Polo mesmo que salimos poco. Porque da la casualidá que les poques bandes que tamos faciendo esto, nun nos podemos dedicar nin semiprofesionalmente a ello. Y eso, evidentemente, fai mella. Pero xente buscando coses distintes, músiques distintes, llingües distintes, hailes por suerte en tolos llaos. Y de la mesma manera que yo consumo música n’euskera, en catalán, en gallegu… Hai xente n’Euskal Herria, en Catalunya o en Galiza qu’escucha la nuestra música, qu’apaez davezu nos nuestros conciertos, que nos pide merchan pa enviar a cualquier sitiu del Estáu o que nos llama pa tocar nos sos festivales y nos sos barrios. Y, mientres eso pase, n’Asturies y nel restu del Estáu, siguiremos aquí, faciendo lo que más nos presta facer.
«Tenemos la esperanza de que vengan más bandes n’asturianu y de que más compañeros d’otres bandes s’animen a cantar nesta llingua. Hai qu’insistir y resistir, y arrimaráse más xente. Porque ye guapo, porque ye nuestro, porque abre puertes. Y sí, ye una escuela d’amor»
Y yá p’acabar. Falaba enantes de la herencia del rock astur. Sois la única banda moza qu’hai anguaño de rock d’esti xéneru. ¿Cómo afrontais esto?
Pues cola esperanza de que vengan más y de que más compañeros d’otres bandes s’animen a cantar n’asturianu, porque sedría riqueza pa la nuestra escena y un públicu potencial maravillosu pa ellos. Anque si abrimos un poco l’espectru del rock astur, sí tenemos bandes qu’usen la llingua. Tenemos a Desaniciu faciendo un hardcore-punk más agresivu n’asturianu. Tenemos bandes como Origen o Sartenazo Cerebral, o otres más recientes como MayDay o Lïbre con temes n’asturianu. Hai qu’insistir y resistir, y arrimaráse más xente. Porque ye guapo, porque ye nuestro, porque abre puertes. Y sí, ye una escuela d’amor.
Suscríbite a les nuestres novedaes
