‘Sirio’ de Fontoria yá ta al completu en toles plataformes dixitales
Sirio, el tercer trabayu de la banda de folk progresivu Fontoria, yá ta disponible al completu en toles plataformes dixitales. Tres llanzar va unes meses en Spotify el discu A y editar en formatu físicu’l doble CD, agora’l grupu piloñés asoleya en formatu dixital les 20 canciones que formen discu B del álbum.
Sirio ye un ambiciosu trabayu doble. El discu A ta formáu por una única pieza instrumental de 74 minutos na que Fontoria xuega a esperimentar cola música de raigañu pa crear «una mecigaya de soníos que van dende los sones tradicionales de dellos llugares del mundu, a los ritmos electrónicos, la lírica, el rock progresivu o la música de cámara». como comenta Maxi Areñes, cabezaleru de la formación.
El discu B que completa la edición de Sirio «tien una duración de 50 minutos y ta enllenu de pieces d’orixe tradicional qu’aporten de llugares como Asturies, Bretaña, Escocia y, en xeneral, tol Arcu Atlánticu». Nél, tamién hai temes de composición propia, anque marcaes por tener «un calter tradicional», como sorraya’l músicu del grupu de folk progresivu.
