Skama la Rede vuelve a tocar n’Asturies depués de dos años
El 21 d’avientu de 2019 Skama la Rede daba’l so últimu conciertu de llarga duración n’Asturies, col qu’amás poníen final a la so xira del 15 aniversariu. Depués llegó l’andanciu y la banda ska-punk pasó 2020 ensin xubir a un escenariu y en 2021 namás tocaron cuatro temes nel conciertu homenaxe a Roces de La Felguera y nel festival Nafarroa Oinez. Pero la espera acabó. Esti sábadu 4 y el próximu 11 d’avientu va poder vese al míticu grupu nun conciertu “como los d’enantes”.
La sala Gong d’Uviéu va acoyer a les 21.30h el conciertu d’esti sábadu. Nél, van tocar tamién los grupos La Mueska y Me Fritos and The Gimme Cheetos con un aforu llendáu a 200 persones y unes entraes que yá ta la venta n’Entradium por 8 euros -na puerta va costar 10 euros-. Per otru llau, la sala Livingstone de Lluanco va acoyer 11 d’avientu a les 23.30h la segunda actuación que Skama la Rede va dar esti mes.
Skama la Rede ye un de los grupos referenciales de la segunda xeneración del Rock Astur. Músicos de Carreño y Gozón formaron en 2004 esta banda ska-punk influyía tamién pol folk asturianu, como demuestra l’usu de la gaita en toles sos composiciones. Tienen publicaos cuatro discos d’estudiu, dellos singles y un compilatoriu pol so 15 Aniversariu. Nellos, rexistren un estilu inconfundible con unes lletres enllenes de reivindicación y nes que la crítica social y la ironía xueguen un papel bien importante.
