El recintu ferial de La Pola Somiedo va festexar esti sábadu 30 de mayu una edición nueva del Encuentro Cultural de Las Polas de Asturias y León, eventu nel que la música, la tradición y la cultura dan forma a una bayurosa programación que cunta cola participación de Pandereteras de Somiedo, Ambás ya Ramsés, l’alumnáu de Nel Villanueva, el grupu de Cancios de Chigre de La Pola Siero, Leirana, la Banda Gaites El Gumial y dellos intérpretes d’asturianada.
La programación musical entama a les 13h cola apertura del mercáu y un primer pase coles actuaciones de Pandereteras de Somiedo y l’alumnáu de les escueles de baille y panderetera de Nel Villanueva de Candamo, Salas y Belmonte. Nel segundu pase -dende les 16h- vuelven a tocar les mesmes formaciones, amás de Leirana. Tamién va haber tonada colos cantadores Sergio Menéndez, César González y Alfonso Menéndez.
A les cinco la tarde Xosé Ambás y Ramsés Ilesies van facer un «taller de xiblatos ya flautes na tradición somedana» y durante tola xornada la Banda Gaites El Gumial y el grupu de Cancios de Chigre de La Pola Siero van actuar peles cais de la capital d’esti conceyu del sur centru-occidente asturianu.
Amás de la música va xuegos tradicionales con 6 Conceyos, talleres d’avistamientu de fauna, paseos a caballu, charres, mercáu tradicional y otres actividaes nesta xornada d’hermanamientu ente Les Poles. De fechu, dende l’Ayuntamiento de La Pola de Gordón animaron «a tolos vecinos y visitantos a participar nesti alcuentru cultural, una cita pa esfrutar de la cultura, les tradiciones y el patrimoniu de dambos territorios«.
Na semeya, Pandereteras de Somiedo
Suscríbite a les nuestres novedaes
