PVXARRA ye un tríu formáu por Ferla Megía a la producción, Cosme a les lletres y voz y Argu al baxu. La so referencia son grupos como Death Grips, IDLES, Kneecap, Chill Mafia, Aphex Twin y soníos como’l punk, rock n’ast, hardcore o drum&bass. Con una propuesta sonora contundente y ensin complexos, PVXARRA suma al IV Semando Fest una descarga d’enerxía y esperimentación que promete nun dexar indiferente a naide. El 7 de febreru, Lata de Zinc va ser l’escenariu d’un directu intensu que confirma que’l festival sigue apostando pola creación nueva y arriesgada n’asturianu. La puesta n’escena del grupu va ser el primer conciertu que van dar na curtia hestoria de la banda. A pocos díes d’esa cita, falamos con Ferla.
Pa quien entá nun vos conoz, ¿cómo presentaríeis a PVXARRA en poques pallabres?
Ruíu. Rabia. Mocedá.
¿Recordáis el momentu nel que pensasteis: “vamos crear un grupu d’esti rollu xuntos»?
Ye dalgo que llevábemos munchu tiempu pensando en facer y un día en branu vínonos la inspiracion y entamamos. El primer tema fixímoslu nuna tarde axuntando sones, cuando vimos el resultáu foi como.. Oi, equí hai daqué…
«Suel pasar que cuando los rapazos miren el movil sal un son que tien daqué, entos dígo-yos que me lo pasen y entamamos a construir el cantar»
¿Cómo ye’l vuestru procesu a la hora de crear los vuestros cantares?
Solemos componer y producir xuntos tomando un café col portatil na cocina de dalguién. Suel pasar que cuando los rapazos miren el movil sal un son que tien daqué, entos dígo-yos que me lo pasen y entamamos a construir el cantar sobre… nun sé.. una ruíu raru o lo que salga… Y Cosme diz que-y salen les lletres segando.
¿Cómo llegais a esti xéneru musical del que malpenes hai nada n’asturianu?
A favor de l’abolición de los xéneros, tamién de los musicales. A lo que facemos nós, llegamos dexándonos llevar. Nunca foi la nuesa intención facelo pa cubrir un nichu nin nada paecío, pero tamién somos conscientes de que nun hai munchu d’esto faciéndose n’asturianu y ye necesario que la xente faiga de too ensin complexos.
«Tenemos yá casi fechu un discu. Nós con tal de siguir pasándolo bien…»
Vais actuar nel Semando Fest y va ser el vuestru primer conciertu. ¿Qué pue esperar el públicu del conciertu de PVXARRA?
Dolor de cabeza.
PVXARRA ye’l grupu cola trayectoria más curtia d’esta edición. ¿Cómo pinta’l so presente y futuru?
El presente pinta bien guapu, va creciendo too bastante bien y rápido. Tenemos yá casi fechu un discu, colabos pendientes… Nós con tal de siguir pasándolo bien…
«Si nun se va al Semando, la música va morrer y va ser sustituyida pola eterna tiranía d’un silenciu insondable»
¿Qué tien d’especial tocar nun festival que sofita la cultura y, especialmente, la cultura fecha por xente mozo?
Que va a ser un conci fechu por xente mozo pa xente mozo.
Pa quien tea dudando en dir a la vuestra actuación, ¿por qué nun tendría que perdelo?
Porque si non la música va morrer y va ser sustituyida pola eterna tiranía d’un silenciu insondable.
Suscríbite a les nuestres novedaes
