El Festival Intercéltico d’Occidente llega esti xueves a la so XXVII edición

La música asturiana va sonar con Llan de Cubel, la Orquestina La Xarangana, la Banda de Gaitas El Centru y Bango.

Eventos

Dende esti xueves y hasta’l próximu llunes 5 d’agostu, Tapia va acoyer la XXVII edición del Festival Intercéltico d’Occidente (FIDO). La programación, que puede consultase completa equí, inclúi conciertos, talleres, charres, una esposición d’indumentaria tradicional asturiana, mercáu y actividaes pa la reciella. La Orquestina La Xarangana, la Banda de Gaitas El Centru, Bango y Llan de Cubel van representar la música asturiana nel eventu.

A les 19h del xueves 1 arranca’l festival col llevantamientu de la bandera celta na Casa’l Conceyu de Tapia, que da pasu a la inauguración del mercáu celta y de la esposición dedicada a la indumentaria tradicional asturiana. Asitiada na Sala d’Esposiciones de la Casa de Cultura de Tapia, ésta va tar abierta tolos díes de 17h a 19 hores. La música asturiana va sonar a les 23h cola actuación de la Orquestina La Xarangana na Verbena Tradicional nel Puertu de Tapia.

El vienres 2 -Día del Neno Celta-, aporta la Banda de Gaitas El Centru del Centru Asturianu de Madrid, que va facer dellos desfiles y actuaciones a lo llargo’l festival xunto a otres formaciones tradicionales gallegues y irlandeses. Amás, la compañía Alcordances va representar una obra de teatru pa la reciella. El sábadu 3 el protagonismu van tenelu los conciertos de Bango y Llan de Cubel na Plaza de la Cámara Agraria a partir de les 23h. El llunes 5 la baxada de la bandera celta supón el zarru d’esti eventu veteranu del calendariu asturianu.

Escuela Internacional de Música Folk

Dientro de la programación, tamién destaquen una serie d’alcuentros alrodiu la cultura celta. El vienres 2 va haber na Plaza del Ayuntamientu, a les 12h, un taller de baille asturianu a cargu d’Ángel Ramón Herrera, mientres que’l sábadu 3 a les 13.15h Pablo González va dar un taller de pandereta nel Auditoriu de Tapia. Pa zarrar les actividaes d’esta escuela, el domingu 4 hai a les 19.30h nel Auditoriu hai una charra sobre la práutica musical nel Centru Asturianu de Madrid impartía por Gonzalo Fernández Ruiz de Zuazo.