El pasáu sábadu 17 d’avientu tuvo llugar el Festival de Navidá de la Escuela de Música Tradicional de la banda gaites Villaviciosa-El Gaitero, onde díbase facer entrega de dos galardones por parte de la propia banda: ún d’ellos pa Delfín Valdés, el cantante del grupu ska-fusión La Tarrancha y del de hiphop K-Nalón, pol so apoyu incondicional a la banda, y otru a Rodrigo Cuevas, pola so llabor na defensa y divulgación de la cultura asturiana. L’eventu tuvo llugar nel Teatru Riera de Villaviciosa, y vino con sorpresa, pues la nominación de Delfo foi un encubrimientu pa poder da-y la distinción a David Muñiz, miembru de la banda, ensin qu’ésti s’enterase. D’esta manera, la banda quixo agradece-y la so implicación y collaboración en tolos eventos y proyectos rellacionaos cola banda, asina como reconocer el so enfotu pa impulsar el Festival Internacional de la Gaita (FIG) de Villaviciosa.
El Festival cuntó amás cola participación de los alumnos de la escuela, con les especialidáes de gaita, tambor, curdión diatónicu, flauta travesera de maera, pandereta y baille. Foi toda una cellebración con sorpresa incluía pa una formación con más de 30 años d’hestoria, que sigue preocupándose por caltener la difusión de la música y la cultura tradicional d’Asturies.
Suscríbite a les nuestres novedaes
