David Muñiz: «Tamos percontentos de poder siguir puxando pola música del país»

Esti xueves 2 de setiembre arranca la segunda edición del DesconFIGnamientu Festival, l’adaptación del Festival Internacional de Gaites de Villaviciosa (FIG) a un formatu más pequeñu por mor del andanciu. «Van ser 4 díes de conciertos, música folk y tradicional», comenta David Muñiz -miembru de La Banda de Gaites de Villaviciosa El Gaitero y ún de los organizadores de eventu-, nos que va haber concursos, gaita, canción asturiana y talleres hasta’l domingu 5 de setiembre.

La banda de balfolk La Bonturné -«formada por veteranos de la escena folk y jazz»- inaugura’l festival el xueves 2 a les 20 hores nel Teatru Riera. El vienres, el Centru Cultural San Xuan de Capistrano acueye a les 17 hores el taller d’empayueláu de la gaita impartíu por Pelayo Fernández; una actividá qu’en palabres de Muñiz «lleva faciéndose dellos años nel marcu del festival y que tien bona acoyida». La presencia internacional d’esti festival aporta’l vienres a les 20 hores col conciertu d’Alberto Jambrina y Pablo Madrid nel Teatru Riera. Muñiz preséntalos como «unos de los grandes recuperadores del folclore de la provincia de Zamora» y desplica que na so actuación va poder sentise «repertoriu de gaita sanabresa, gaita alistana, dulzaina, gaita charra o flauta de tres agujeros».

El sábadu 4 va haber actividaes dende les 12 la mañana. A esa hora entama na Casa de los Hevía la charra de Daniel García de la Cuesta sobre’l pórticu de Santa María de la Oliva, «una ilesia románica qu’hai nel centru de Villaviciosa que tien músicos representaos nos sos capiteles». Tamién al mediudía el DesconFIGnamientu Festival «recupera a les bandines tocando pelos chigres de La Villa» , una actividá que, como sorraya’l miembru de la banda gaites, «l’añu pasáu nun se pudo facer y qu’agora facemos tamién como sofitu a la hostelería local». Pela tarde, a les 20 hores, l’escenariu del Teatru Riera va axuntar a la historia y al presente del folk asturianu colos conciertos de Felpeyu y Algaire.

«El domingu al mediudía tenemos el Certame de Canción Asturiana “Xavi Solares”, que dende l’añu pasáu se llama asina n’homeaxe al so ideólogu, que por desgracia nun ta ente nós y foi miembru de la Banda de Gaites de Villaviciosa dellos años», comenta Muñiz qu’acaba esti repasu a la programación d’esti festival destacando la XI edición del Concursu de Gaita “Memorial José Huerta”, que va ser a les 19 hores nel Teatru Riera.

Entraes disponibles

Sacantes pal conciertu de Felpeyu y Algaire, tovía hai entraes pa tolos eventos del DesconFIGnamientu Festival 2.0 que pueden acutase a traviés del corréu desconfig.fest@gmail.com y, pal taller y la charra, en festivalinternacionaldelagaita@gmail.com. «Tamos percontentos de poder seguir puxando pola cultura del país y pola música folk y tradicional», conclúi’l miembru de la Banda Gaites de Villaviciosa, amás d’agradecer al Ayuntamientu de Villaviciosa y a Grupo El Gaitero «el so sofitu incondicional».

Comprar discos de gaita na tienda online