La historia de la gaita nun termina n’Asturies nin en Galicia. Mientres los sieglos XIX y XX, los procesos migratorios llevaron instrumentos, repertoriu, músicos y formes d’entender la música muncho más allá de los sos territorios d’orixe. Cuba foi’l principal destín de la emigración asturiana a América y segundu de la emigración gallega, siguíu d’Arxentina. Foi amás en Cuba onde se fundaron los principales símbolos de la cultura gallega, como l’Himnu de Galicia o la Real Academia Gallega.
Sobre esta presencia y sobre les relaciones musicales y culturales establecíes ente la islla y el noroeste peninsular centró los sos últimos años d’investigación la musicóloga y gaitera Susana de la Cruz. El resultáu d’esti trabayu ye la so tesis doctoral, «La gaita y la música asturiana y gallega en Cuba. Espacios culturales y transculturación sonora», dirixida pol Dr. Julio Ogas.
De la Cruz defendió la investigación el pasáu 10 de xunetu nel Salón de Graos del Departamentu d’Historia del Arte y Musicoloxía de la Facultá de Filosofía y Lletres de la Universidá d’Uviéu, rematando asina una llinia de trabayu qu’afrontó la música de les comunidaes asturiana y gallega en Cuba dende una perspectiva histórica y musicolóxica.
La investigación sobre la gaita esperimentó nes últimes décades una progresiva ampliación de los sos campos d’estudiu. Si bona parte de los trabayos desenvueltos a finales del sieglu XX y empiezos del XXI tuvieron empobinaos a reconstruyir la historia del instrumentu y documentar la so presencia n’Asturies, les investigaciones actuales incorporaron nueves preguntes: cómo circulen les tradiciones musicales, qué ocurre cuando un instrumentu llega a otru contestu cultural, cómo se tresforma un repertoriu y qué papel desempeñen les músiques tradicionales na construcción d’identidaes.
La tesis de Susana de la Cruz asítiase precisamente nesti ámbitu. El so oxetu d’estudiu nun ye namás la presencia física de la gaita en Cuba, sinón el conxuntu de relaciones sociales y culturales que fixeron posible’l so caltenimientu, tresformación y tresmisión.
El conceptu de transculturación sonora resulta fundamental pa entender esti aproximamientu. En llugar de considerar la música como un elementu que permanez inalteráu cuando viaxa d’un territoriu a otru, esti conceptu dexa analizar los intercambios y tresformaciones que se producen cuando diferentes práctiques musicales entren en contactu. Nesti contestu, la gaita funcionó tamién como una especie de «casa sonora», capaz de remembrar el territoriu d’orixe, activar alcordances y reforzar los venceyos ente los emigrantes y les sos comunidaes. Nel casu cubanu, les músiques d’orixe asturianu y gallegu convivendo con un contestu sonoru mui diferente y participaron de nuevos espacios sociales y culturales.
Les sociedaes d’emigrantes, les agrupaciones musicales, les celebraciones y les romeríes fueron dalgunos d’esos espacios. Nellos, la música cumplió una función que diba más allá del entretenimientu: contribuyó a caltener venceyos colos llugares d’orixe y, coles mesmes, a crear nueves formes de pertenencia na sociedá cubana.
L’adaptación tamién se produció n’el mesmu ámbitu musical. Nes celebraciones y espacios d’ociu de L’Habana, la gaita convivió con bandes de música, sestetos soneros, orquestes de danzón y jazz bands. La documentación amuesa cómo repertorios de tradición asturiana y gallega compartíen espaciu con xéneros de la música popular cubana, dando llugar a nueves formes d’interpretación.
La defensa de la tesis supón, por tanto, daqué más que la culminación d’una etapa académica. Tamién consolida una llinia d’investigación que contribúi a ampliar la historia de la gaita asturiana y gallega incorporando un escenariu qu’hasta agora recibió una atención muncho menor: Cuba.
L’interés d’esti enfoque ta precisamente en que dexa ver qué asocede con una tradición musical cuando camuda de contestu. La emigración nun implica necesariamente la desapaición de les práctiques musicales d’orixe. N’ocasiones, estes caltiénense, adáptense, entren en contactu con otres músiques y adquieren nuevos significaos.
La investigación de Susana de la Cruz pon el focu nesi procesu y recupera nomes, espacios, agrupaciones y práctiques musicales que formen parte d’una historia compartida ente Asturies, Galicia y Cuba. El trabayu documental dexó identificar nominalmente a más d’un centenar de gaiteros que desenvolvieron la so actividá na islla a lo llargo de más de 150 años, una cifra que podría ser entá mayor debío a les llimitaciones de les fontes calteníes.
Lloñe de tratase d’una presencia puntual o anecdótica, la documentación dexa siguir l’actividá de gaiteros y práctiques musicales vinculaes al instrumentu mientres más de ciento cincuenta años. A lo llargo d’esti periodu, la gaita tuvo presente en romeríes, celebraciones, teatros, agrupaciones musicales y otros espacios de sociabilidá de les comunidaes asturiana y gallega.
El tribunal encargáu d’evaluar la tesis tuvo formáu pola Dra. Celsa Alonso y el Dr. Iván César Morales, de la Universidá d’Uviéu; el Dr. Javier Garbayo, de la Universidá de Santiago de Compostela; la Dra. Margarita Pearce, de la Universidá de La Laguna; y la Dra. Estibaliz Santamaría, de la Florida International University. Tres de la defensa, Susana de la Cruz llogró la máxima calificación y pasó a incorporase como doctora al ámbitu de la investigación musicolóxica.
Anque la tesis nun s’atopa anguaño disponible n’accesu abiertu, les sos publicaciones dexen averase a bona parte de les cuestiones que vertebren la so investigación. Una investigación que mira a la gaita dende un llugar diferente: non solo dende’l territoriu nel que nació o se desenvolvió, sinón tamién dende los caminos que percorrieron los sos músicos y dende los nuevos contestos nos que la tradición volvió sonar.
En Cuba, la gaita tamién forma parte de la historia de la emigración asturiana y gallega. Y estudiar esa historia significa, a lo postrero entender cómo una tradición musical pue viaxar, tresformase y siguir construyendo memoria lloñe del so llugar d’orixe.
La defensa de la tesis supón el zarru d’una importante etapa, pero tamién abre nueves preguntes alredor d’una investigación que conecta música, migración, identidá y memoria. Pa conocer meyor el procesu qu’hai detrás d’esti trabayu y les perspectives que s’abren dempués de la defensa, falamos cola Dra. Susana de la Cruz sobre dalgunos de los retos de la investigación, la so recepción dientro de la comunidá gaitera y les sos posibles llinies de continuidá.
La escasez d’estudios precedentes sobre la tema. Dende l’ámbitu históricu afrontóse’l fenómenu migratoriu ástur-galaicu a Cuba, pero dende la musicoloxía apenes atopamos investigaciones. D’una banda, apreciar el panorama nel so conxuntu, definilu y organizalu foi un elementu de dificultá a considerar y, d’otra, l’accesu a les fontes y el trabayu col material alcontráu n’España, Cuba y Estaos Xuníos (munches vegaes non dixitalizao en manes de coleccionistes privaos) supunxo un retu significativu de la investigación.
La comunidá gaitera agradez qu’afondemos nestes investigaciones. Somos dellos los doctorandos que d’ún o otru enfoque tamos trabayando sobre la gaita, incluyíu’l trabayu que realices sobre la gaita n’Asturies y esi diálogu ente la música tradicional y la formación académica que llueu vamos tener a disposición. Sobremanera, tenemos d’incidir na divulgación de los resultaos tanto pa la comunidá gaitera en particular como pal conxuntu de la sociedá, y esti ye’l compromisu de realizar una tesis doctoral.
Por supuestu. Tamos trabayando nello y l’oxetivu sería publicalo nesti cursu y que tol material investigáu y recuperáu tea a disposición del públicu, y seya, de la mesma, motivu de nueves investigaciones.
La investigación de Susana de la Cruz asitia asina la gaita asturiana y gallega nun espaciu que dexa reparala dende una perspectiva distinta: la de los desplazamientos, los alcuentros y les tresformaciones qu’esperimenten les tradiciones musicales cuando traviesen fronteres. El so trabayu contribúi a recuperar una parte de la historia compartida ente Asturies, Galicia y Cuba y, coles mesmes, plantega nueves posibilidaes pa siguir estudiando los caminos percorríos pola gaita y poles comunidaes que la llevaron consigo al otru llau del Atlánticu.
Suscríbite a les nuestres novedaes
