Los Concetsones foron ún d’esos grupos etnográficos que, nos años 80 y 90 del sieglu pasáu, caltuvieron y prendieron la cabera semiente de cultura tradicional asturiana que quedaba; nel so casu, nos pueblos vaqueiros de les brañes de Tinéu. Esti sábadu 10 de mayu vuelven a xuntase dempués de cuarenta años nel Cine Marvi (Tinéu) dende les 19.30h nun actu de celebración y alcordanza que tamién quier mirar a les nueves xeneraciones, y nel que van presentar el bail.le del puntu, un exemplu especial del so llabor naquella dómina. Falamos con L.luis Cristóbal, ún de los sos impulsores, p’afondar nel so trabayu y nesti eventu nel que, amás d’asoleyar material audiovisual cuasique inéditu, el Conceyu de Cultura Tradicional Vezos Astures va representar la so interpretación d’esti baille xaldu.
Primero de too, ¿cómo y en qué contestu surdió’l grupu de Los Concetsones? ¿Ente qué años tuvistis n’activo?
Nos años 80, teníemos daquella al rodiu 20 años. Siempre nos gustó muncho’l folclore a un grupu d’amigos de Tinéu y pensábemos que teníemos que facer dalgo con ello. Lo meyor que podíemos facer yera principiar faciendo dalgo nes fiestes del pueblu que fuere de verdá. Como teníemos tan cerca a los vaqueiros, fuimos peles brañes falando con ellos y conseguimos que l’ayuntamientu nos dexara facer un festival vaqueiru perguapu. Baxaben los vaqueiros a baillar, fixímonos amigos d’ellos y d’ehí quedó una familiaridá que caltenemos hasta güei. Entamamos a facer el grupu, baillábamos con ellos y yera bastante fácil porque, namás arimanos, yá yéremos como de casa. Empezamos nel 1985 hasta’l 1998, unos catorce años.
Nesos años, ficistis un llabor perimportante pa recuperar la cultura, música y baille vaqueiros, ¿cuál pienses que foi la mayor aportación nesi sen?
Formóse n’Asturies una federación perimportante d’etnografía y folclore na que coincidimos con otros grupos que taben faciendo lo mesmo que nós y d’ehí salieron delles idees: nun teníemos que baillar namás, sinón conservar eso de dalguna manera. Foi entós cuando entamamos a facer los trabayos de campu, d’aquella manera. Podemos presumir de topar de primer mano a les últimes tocadores de pandereta y de payel.la -nun había cuasi nada yá-, que foron les nuestres maestres.
«Entamamos a facer los trabayos de campu d’aquella manera. Podemos presumir de topar de primer mano a les últimes tocadores de pandereta y de payel.la, que foron les nuestres maestres»
Anque recuperastis y espardistis munches espresiones qu’anguaño conócense per toa Asturies como la Xota Las Tabiernas o La Media Vuelta, supongo qu’entá quedaron coses nes qu’afondar, ¿hai dalguna cosa sobre la que vos tuviere prestao investigar más?
Yo creo qu’investigamos tolo que pudimos. Quedaríanos dalguna cosa, pero tampoco yéremos nin somos nin seremos etnógrafos; nós yéremos medios recuperadores del folclore. Entrugábamos polo que nos parecía que taba desapareciendo: baille, instrumentación, indumentaria…
Col tema de la indumentaria ficimos un bon trabayu, por exemplu. Podíemos presumir de que, sobre too nes muyeres, topábemos muncha ropa. Diben vistíes con ropa antigua que tovía se conservaba, a la manera de finales del sieglu XIX. Cuando salíemos perhí, entrugábennos si yéremos alemanes o qué yéremos. ¡Mira qué pena, eh! Siendo asturianos. Dicíemos: «non, somos asturianos, vaqueiros ya de Tinéu». Nesa dómina namás vendíen la moto los grupos de Sección femenina y tuvimos que lluchar contra eso, pero nun nos importó pa nada.
«Investigamos tolo que pudimos. Quedaríanos dalguna cosa, pero tampoco yéremos nin somos nin seremos etnógrafos; nós yéremos medios recuperadores del folclore»
¿Qué torgues o dificultaes topastis faciendo esa xera d’investigación teniendo en cuenta de que yá nesa época la cadena de tresmisión y los vezos tradicionales taben sufriendo una quiebra importante?
Voi contar, por exemplu, qué medios teníemos nesa época pero qué afán teníemos tamién. Naquella época nel grupu Los Concetsones nun teníemos ente toos nin pa un radiocasé pa poder dir al pueblu a grabar. Tardábemos dos hores en llegar a la braña caminando. Llegabes ellí a qu’una vaqueira te tocara y nun tenía con qué, porque sabía tocar la pandereta pero facía 40 años que nun lo facía. Sacaba un balde de la ropa pa tocar con él y deprendíemos asina. Más puro qu’eso y más primitivo nun lo hai, eso yá nun-y toca a naide. Como esta podría contar venti mil histories.
«Daquella nun teníemos nin pa un radiocasé pa poder dir al pueblu a grabar. Tardábemos dos hores en llegar caminando a la braña, a qu’una vaqueira te tocara, y nun tenía con qué. Sacaba un balde de la ropa pa tocar y deprendíemos asina»
Y, per otru llau, ¿cuálos foron los momentos más especiales o que recuerdes con más ciñu?
Lo que más recuerdo ye l’espíritu de la época, el saber que tábemos desarrollando un llabor bonu porque yá los últimos vaqueiros que baillaben taben desapareciendo. Sentíemonos como parte de dalgo inmenso. Sabíemos que nunos años eso diba desaparecer y teníemos esi compromisu de tirar p’alantre con eso. Nun fuimos nós solo eh, hubo otros grupos como Xurgar nas Costumes en L.luarca, L’Aniciu de Mieres, Escontra’l Raigañu d’Avilés, L’Andecha Folclor d’Uviéu…
Ye una cosa preciosa que de vez en cuando fáltanos y emociónanos. Agora que volvimos xuntanos pa esto del día 10, dempués de 20 años, volvimos baillar y salíanos pel alma.
Precisamente, el día 10 celebráis los cuarenta años, ¿por qué volver a xuntavos agora y por qué presentando’l bail.le del puntu?
El bail.le del puntu dexó de baillase nos años 30 del sieglu pasáu, en 1930 yá lu baillaba mui poca xente. Nos años 80, cuando díbemos perhí, foi mui difícil, pero atopámoslu nuna zona mui concreta, en cuatro o cinco parroquies al norte de Tinéu. Ficimos un trabayu de campu perguapu, d’arqueoloxía. Nun ye un baille vaqueiru, ye un baille xaldu. Tuvimos dellos testimonios, y dellos yeren centenarios, interpretando’l baille. Tola xente qu’alcontramos nacieren ente 1890 y 1905. Cuando-yos pidimos que lu baillaren yá teníen ente noventa y cien años, facíenlo como persones mayores, pero, como digo yo, sabíen bien lo que baillaben.
Esti eventu ta fechu pa que tola xente d’esa época nos xuntemos pa siguir tresmitiendo esi espíritu. Anque solo seya por ver eses imáxenes, dalguién que tenga un poco de cariñu pola etnografía y pol folclore, yo creo que tien que presta-y.
«El bail.le del puntu dexó de baillase nos años 30 del sieglu pasáu. Ficimos con él un trabayu de campu perguapu, d’arqueoloxía. Tola xente qu’alcontramos nacieren ente 1890 y 1905, pero sabíen bien lo que baillaben»
¿Qué particularidaes tien esi baille pa ser tan especial pal grupu, amás del so venceyu a Tinéu?
Como nun soi etnógrafu, namás un intérprete de lo que veo, puedo dicir que ye un baille que nun ye nin una xota nin un son d’arriba, anque ta en 3/8. Ye dalgo único, el bail.le del puntu. Nun sabría ónde encaxalu. Llueu eses imáxenes pueden interpretase de mil formes. Lo importante ye que se baille y, pelo menos, s’escuche la música. Interpretóla un paisanu que tocaba’l bandoneón. Ye la primer noticia que se tien de qu’un músicu tradicional tocara l’instrumentu. Un músicu perbonu, Serapio, que va poder sentise’l día 10.
¿Con qué informantes contastis en 1989? ¿Cómo yera la rellación qu’afitabeis con esa xente que vos abría les puertes de so casa y vos apurría les sos esperiencies?
Primero de too, Serapio -el que tocaba’l bandoneón-, dempués, Perfeuta de Bustel.lón -que ye la madre del puntu-, El Fandalo de Sanfrichosu, Oliva d’Ol.leirus, El Butico de Busturniegu, Ceferina la Peldora d’Oubona, José Antonio de Peñafolgueiros y Saúl d’Ol.leirus. Los informantes son perimportantes. Amás, va salir guapu l’actu porque hubo una rempuesta mui bona; van venir de tolos pueblos los nietos, bisnietos y tataranietos a ver a los sos familiares nos vídeos.
Yera una sensación tan guapa llegar a una casa d’aquelles como les d’enantes, enllenes de xente, con tres xeneraciones tovía -güela, madre y fía-. Llegabes a falar col vieyu o la vieyina y, cuando entamabes a falar d’estes coses, sentíes a esa persona que yera’l centru d’atención, víes aquellos güeyos esfrutar… ¿Sabes lo que supunxo pa esa paisana qu’atopamos que baillaba’l puntu, que facía sesenta o setenta años que nun baillaba? Foi emocionante pa ellos, y pa les persones que díbemos, muncho más.
«Yera una sensación tan guapa llegar a una casa d’aquelles, enllenes de xente, con tres xeneraciones tovía. Llegabes a falar col vieyu o la vieyina y víes aquellos güeyos esfrutar… Foi emocionante pa ellos, y pa les persones que díbemos, muncho más»
Y ¿cómo llegabeis a saber d’esi baille y d’esa xente?
Tuvimos dos o tres años detrás d’esti bail.le del puntu. Home, nun vivíemos d’ello. Díbemos picando y preguntando hasta que garramos el filu y apaecieron siete persones. Yo trabayaba nuna gasolinera y cuando venía la xente dicía «oye, tamos buscando esto». Una xente contestaba «oi, qué va, eso baillábalo mio güelu pero yá morrió». Hasta qu’un día llegó Mero -que yera un paisanu que tendría yá 75 o 80 años- y díxome que lo baillaba so tía, Perfeuta. Tiramos d’ello y entamó a salir la zona d’esos pueblos preciosos qu’hai al norte de Tinéu. Baillábase seguramente en tol conceyu, pero nesa zona caltúvose porque, como digo yo, yeren ‘los últimos de Filipinas’, una familia mui arraigada nel folclore.
Si podemos conocer el patrimoniu oral y musical del país ye gracies a colectivos como’l vuesu que va décades desendolcastis un trabayu escomanáu pa caltenelu, ¿fai falta más apoyu institucional? ¿Qué debieren facer les instituciones públiques pa ocupase -anque tarde- d’esta xera y pa que’l llabor que ficistis nun se perda?
Tamos siempre pidiendo que les instituciones fagan y, como temos pensando nes instituciones, nun se fai nada. Tien qu’haber xente mozo que puxe por ello. Lo que sí, tienen que facer por dar la oportunidá a eses xeneraciones nueves de revisar los archivos, porque tenémoslo too nel Muséu del Pueblu d’Asturies en Xixón. Hai un gran material. Llueu, tenenos en cuenta a los que recoyimos pa dar los nuestros puntos de vista sobre too ello.
Suscríbite a les nuestres novedaes
