Tapia celebra’l 25 aniversariu del Festival Intercéltico d’Occidente del 3 al 8 d’agostu

El Festival Intercéltico d’Occidente (FIDO) cumple un cuartu de sieglu y va celebralo enllenando Tapia de cultura celta dende’l 3 al 8 d’agostu. Charres, talleres, esposición, mercáu y conciertos dan forma a una programación na que la música asturiana va sonar coles actuaciones de Los Gascones, Guieldu, Burbús, el tríu astur-andaluz Deira, la Banda Gaites Camín de Fierro y l’agrupación folclórica L’Artusu de Figareo.

A les 19h del miércoles 3 va arrancar el festival col llevantamientu de la bandera celta na Casa’l Conceyu de Tapia, que da pasu a la inauguración del mercáu celta y de la esposición dedicada al 25 aniversariu del FIDO. Asitiada na Antigua Casa de Cultura, ésta va tar abierta tolos díes de 20.30 a 21.15 hores. Al día siguiente’l protagonismu de la música asturiana va ser a les 23h cola actuación de la bandina popular Los Gascones nel Puertu de Tapia, mientres que’l vienres 5 ye’l día con más presencia de bandes autóctones: el grupu mozu de folk celta Guieldu y la formación nueva de música tradicional reellaborada, Burbús, son los encargaos d’actuar na Playa del Murallón a les 22.30h.

Dientro de la xornada del vienres 5 destaca la participación asturiana na Escuela Internacional de Música Folk, una serie d’alcuentros alrodiu la cultura celta que va haber na Plaza l’Ayuntamientu. A les 12h Ángel Ramón Herrera va dar un cursu de baille asturianu, a les 19h Héctor Aneiros de Guieldu va falar sobre la flauta na música folk y a les 20h José Luis García, director de la Banda Gaites Villa de Xixón y componente de Burbús, da la ponencia Trino. La evolución 4.0 de la gaita.

El grupu de baille L’Artusu va desplazase’l sábadu 6 dende Figareo hasta Tapia p’animar el mercáu celta a les 12.45h y el puertu d’esta villa marinera a les 19h. Mentes que’l domingu 7 ye la Banda Gaites Camín de Fierro la que va participar a les 12.15h n’Alborada del Mar, na misa folclórica de les 13h y nel mercáu celta a les 19h. Esi mesmu día, el tríu astur-andaluz Deira va actuar a les 22.30h na Playa del Murallón pa zarrar los conciertos del festival.

Actuaciones internacionales

Amás de la música asturiana, les actuaciones internacionales van sonar con puxu nesti festival intercélticu. D’esta manera, El gaiteru gallegu Carlos Núñez va tocar el miércoles 3 nel Auditoriu de Tapia a les 20.30h y a les 22.30h; el grupu de baille irlandés North Coast Dance Company aporta’l xueves 4 pa dar un cursu de baille a les 12.30h y actuar a les 21.30h; la Cambridgeshire Caledonian Pipe Band d’Escocia va percorrer les cais de Tapia a les 12.30h y 16h del vienres 5; y el músicu gallegu Anxo Lorenzo va dar una charra a les 19,30h del sábadu y tocar a les 23.30h nel Murallón compartiendo escenariu con Meehan Family & North Coasts Dance. Cola baxada de bandera’l llunes 8, Tapia despide la 25 edición d’esta Fiesta d’Interés Turísticu Rexonal y cita imprescindible de la música de raigañu nel occidente del país.

Mercar discos folk y celta na tienda online