Tres d’un tiempu ensin xubir a los escenarios d’Asturies cola so banda al completu, el gaiteru Rubén Alba va dar un conciertu esti vienres a les 20h nel Teatru El Llar de Les Vegues (Corvera). La cita sirve como presentación del so últimu discu, Secretos sin contar, que’l músicu asoleyó en mayu de 2024, col que ganó’l premiu AMAS a Mejor Disco Folk y nel que soníos folk, pop y rock entemécense con melodíes de composición propia.
L’avilesín Rubén Alba ye ún de los integrantes de la tercer xeneración de gaiteros surdida depués del boom qu’esti instrumentu esperimentó nos años 80. Principió la so formación con once años, integrándose na Banda de Gaites Tabladar, dirixida por José Manuel Tejedor; con dieciocho años (2002) proclamábase ganador del prestixosu Tornéu Macallan del Festival Intercélticu d’An Oriant/Lorient, gallardón que volvería a ganar nel 2006. A lo llargo de los sos más de trenta años de carrera tien collaborao con bien de compañeros y compañeres de la música asturiana, presentándose como intérprete solista nel 2018 col trabayu discográficu Despertar, nel que publica un conxuntu de pieces de calter folk-rock con un soníu compactu y puxante.
Na so segunda entrega, Secretos sin contar, repite prácticamente la banda que lu acompaña, nomes perbién conocíos na escena musical del país. L’álbum presenta delles novedaes respecto al anterior, anque la producción y el soníu siguen na mesma llinia. Esta entrega nueva entemez intensidá y momentos más seles y melódicos, con pasaxes rockeros y otros na onda del folk más avezáu. Nél destaquen collaboraciones como les d’Eva Tejedor, Javi Tejedor, Juan Duarte (Vrienden, Juanillous 2.0), Salva (Deira), Rubén Díaz (Rarefolk) y l’escocés Mohsen Amini.
Suscríbite a les nuestres novedaes
