«Cuasi tolos fines de selmana queremos dedicar un día al cantu popular asturianu: cancios de chigre, tonada, o coses más tradicionales, pero sobre manera lo que creemos que ye más propio del chigre -tonada y cantares-, porque la música pal baille tamién ye natural del chigre, pero tamién notros espacios, y el chigre ye como’l templete de l’asturianada, de los cancios de chigre y eso préstanos pola vida», con estes pallabres desplicaba Rodrigo Cuevas a Musicasturiana.com ún de los oxetivos de La Maléfica de L’Infiestu. Y nello tán, como demuestra la programación que tienen esti fin de selmana.
Esti vienres 20 de febreru dende les 20h va haber tonada, monólogos y cantares de chigre cola participación d’Antonio Esteban a la gaita, Ángeles Quero, Patallo, Fernando Arduengo, Rafa Diez y Enrique Pelaez. El sábadu 21 ye’l momentu del baille’l país nesti espaciu impulsáu por La Benéfica de Piloña. A les 13h actúen la bandina Los Llerones, formada por componentes del Grupu Folclóricu Prau Llerón, Algaire, Pandereteros d’Anguaño, Picarós y Corquiéu, ente otros. Toles actividaes son con entrada llibre.
Suscríbite a les nuestres novedaes
