Esti fin de selmana aporta Una Señora Fiesta, ún de los festivales del branu asturianu que más éxitu de públicu tien y que dende’l 2018 enllena Piloña de músiques de raigañu, de vanguardia y d’otres manifestaciones culturales. Como novedá, esti añu l’eventu va durar dende’l vienres 25 al domingu 27, con un formatu estremáu pa cada día: filandón, conciertos y romería. En toos la música y cultura n’asturianu va tar bien presente.
USF 2025 entama’l vienres 25 col Filandón. Alcuentru de tradición oral de La Meredal, nel pueblu de Vegarrionda. Xosé Ambás, les muyeres de Café, galletines y cuentinos, l’Asociación Ríu Fontoria y el zamoranu DonGuti intervenen nesta cita que va axuntar, dende les 20h y con entrada de baldre, «cuentos, pallabres, histories, música, baille y muncho calorín vecinal», como anuncien dende la organización.
El sábadu 26 La Benéfica de L’Infiestu ye l’espaciu que va agospiar el festival. Amás de l’actuación gratuita a les 12h de Los Titiriteros de Binéfar, pela nueche son los conciertos. Con toles entraes agotaes dende cuantayá va actuar l’artista multidisciplinar Ferla Megía xunto a la formación francesa Cocanha y los catalanes Gregotechno.
La octava edición d’Una Señora Fiesta remata’l domingu 27 dende les doce’l mediudía nel Prau de La Bilortera, en Vegarrionda cola Romería. Ellí va haber lo que la organización del eventu -col axitador folclóricu Rodrigo Cuevas como cabezaleru- define como «una fiesta de prau pa gociar como siempre, como nunca, ensin música amplificao, con vermú a cargu de Bandina Los Muiles, concursos, xuegos, bailles, sorpreses y esi tipu de coses máxiques que namás pasen nesti prau piloñés». Tola xente que quiera pue llevar el so instrumentu y tocar nesta romería participativa que pon el ramu a un festival nel que xenerar comunidá ye lo fundamental.
Suscríbite a les nuestres novedaes
