La parroquia xixonesa de Granda va volver enllenase de música de raíz el próximu 26 de xunetu, a partir de les 19:00 hores, cola celebración de la XXVII Nueche Celta, una cita yá consolidada dientro de la programación de la tradicional del calendariu musical asturianu. El cartelu d’esti añu axunta a delles formaciones representatives del panorama folk asturianu, combinando propuestes de baille tradicional, música de raigañu y soníos contemporaneos dientro del xéneru.
L’apartáu más venceyáu a la tradición va venir de la mano del Grupu Folklóricu Trebeyu, encargáu de poner n’escena’l baille y el repertoriu de pandereteres, elementos esenciales en cualquier Nueche Celta, al traviés d’un taller de baille tradicional. Con una trayectoria vinculada a la recuperación y espardimientu del folclore asturianu, Trebeyu va apurrir la parte más visual y participativa de la xornada.
Nel tarrén musical, Herbamora va llevar la so propuesta basada na reinterpretación del repertoriu tradicional, con arreglos curiaos y una sonoridá que combina lo acústico con matices actuales. Pela so parte, Abéu va poner la nota moza na Nueche Celta. La formación aporta al eventu con una propuesta fresca dientro del panorama actual, qu’entemez temes tradicionales con nueves composiciones, calteniendo siempre la esencia de la música asturiana tradicional pero con un enfoque anováu.
El cartelu complétase con Mediarea, banda gallega que va apurrir una visión más contemporanea del xéneru, con composiciones propies que parten de la tradición gallega pero incorporen influencies modernes, creando un directu dinámicu que conecta con públicos diversos.
Suscríbite a les nuestres novedaes
