Xune Elipe: «La música como creadora d’identidá»

ENTAMU

La música tien acompañao al ser humanu dende’l principiu de los tiempos, ye ún de los rituales más antiguos de la especie humana que reflexa y espresa les nuestres emociones, pasiones y sentimientos. Nun hai vida cotidiana ensin música, les diferentes cultures presentes nel planeta Tierra llograron crear melodíes, ritmos y cantares que desempeñaron un papel trescendental nel desarrollu de la humanidá; dende los cantos de los pueblos primitivos hasta los ritmos más urbanos como’l rock o’l jazz tuvieron una repercusión perimportante nel desarrollu de la sociedá.

Xuega un papel fundamental nes sociedaes humanes: ye comunicación ente los individuos y reflexa la cultura de la que formamos parte. Nesti sen, reconocemos en ciertes melodíes o cantares los nuestros raigaños sociales que marquen la pertenencia a una cultura determinada y posibilítanos reconocer un pasáu común, asitianos nun presente y proyectar un futuru. Y ye que la música puede representar, simbolizar y ufiertar la esperiencia inmediata de la identidad colectiva.

«Reconocemos en ciertes melodíes o cantares los nuestros raigaños sociales que marquen la pertenencia a una cultura determinada»

Otra de les funciones de la música popular ye la de dar forma a la memoria colectiva y, amás, polo menos nos últimos cincuenta años, ésta constituyó una vía fundamental pa deprender a entendenos como suxetos históricos, con identidá étnica, de clas y de xéneru. Nesti sen, ye tamién un factor perimportante que contribúi a la xeneración y construcción d’identidaes sociales (individual, colectiva, llingüística, nacional…) que nos definen y acompañen a lo llargo de la vida. 

Afondando nello, ente tolos grupos sociales, ésta ye parte de los procesos de reellaboración de la identidá colectiva. Nel nuestru país, la sociedá nun ye ayeno a too ello y la música ye un elementu -y non menor- d’eso que llamamos l’asturianidá.

«Nel nuestru país, la sociedá nun ye ayeno a too ello y la música ye un elementu -y non menor- d’eso que llamamos l’asturianidá»

HAI UNA LLINIA TRAZADA

Valgan les palabres anteriores como «xustificación» al porqué de la necesidá d’un trabayu como ‘Hai una llinia trazada. Historia de la música asturiana’, col que gané’l XXVI Premiu Máximo Fuertes Acevedo. El mesmu ye’l resultáu de la mio trayectoria vital, venceyada a la música asturiana dende mui mozu y nes más estremaes xeres. Foi un llabor d’unos tres años nos qu’hebo que poner n’orde tol material atropáu, esbillar los datos realmente importantes o significativos, estructurar los capítulos nos que debía dixebrase’l testu, redactar un testu rigurosu pero al empar con un enclín divulgativu…

Hai bien de monografíes y publicaciones que traten aspectos concretos o específicos de la música asturiana (sobre dalguna corriente o escena determinada o dalgún/a intérprete), pero prácticamente nun existía nenguna que falare del fechu musical asturianu íntegra y globalmente. Otra manera, quixi facer una historia de la música asturiana contestualizada y interrellacionada con cada momentu históricu nel planu artísticu, cultural, lliterariu, social y políticu. Y ello porque, por exemplu, nun ye posible entender dafechu cómo se pudo dar una verdadera Edá d’Oru de la nuestra música nes primeres tres décades del sieglu XX (cuando surden los compositores, los intérpretes y les pieces consideraes clásiques anguaño) ensin conocer l’ambiente socio-políticu del momentu, con movimientos como’l federalismu republicanu o’l rexonalismu, colos que figures como los escritores y músicos Pin de Pría o Pachín de Melás sintonizaben. Del mesmu mou, ye imposible deslligar el surdimientu de la música asturiana contemporánea col Nuevu Canciu Astur del nacionalismu de nuevu cuñu xeneráu a partir de la creación de l’asociación Conceyu Bable en 1974.

«Nun ye posible entender cómo se pudo dar una Edá d’Oru de la nuestra música nes primeres tres décades del sieglu XX ensin conocer l’ambiente socio-políticu del momentu, con movimientos como’l federalismu republicanu o’l rexonalismu»

La segunda cuestión a la de facer esti trabayu que quixi tener en cuenta foi la d’ufiertar un tratamientu non colonial, nel sen de dir al orixe, evitando intermediarios. Tratar a la música asturiana como una entidá con vida propia, non supeditada a otros procesos o como un apéndiz de dalgo superior. Asina, cuando trato’l movimientu conocíu como Folk Testimoniu, que se dio n’Asturies nos primeros años 70, fáigolo abordando’l ‘revival folk’ norteamericanu de los 60 y non como una imitación o un siguidismu de lo que taben faciendo grupos españoles como Nuestro Pequeño Mundo o Aguaviva.

Amás d’estes tres premises -globalidá, contestu y non colonialismu-, hai una tercera que tamién hai que tener en cuenta: militancia. Y ye que’l testu ta fechu dende un compromisu ideolóxicu claru, el de la defensa de la identidá asturiana (musical, cultural, llingüística y nacional), eso qu’enantes nomaba como ‘asturianidá’. Naide esplica meyor el mio enfotu que l’investigador Santos Cesarios Benavente Véliz cuando diz: «…los pueblos dominaos constrúin les sos identidaes dirixíes a la conservación de la llingua materna, les sos festividaes tradicionales, la so música, danza, comida, ritualidá, etc., asumen característiques polítiques delles veces intolerables pa los colonialistes y les autoridaes llocales subordinaes, por cuanto toa manifestación de vitalidá d’una cultura nun pueblu sometíu tien un indiscutible calter d’impugnación de la cultura de los dominadores» (‘La cultura popular: La música como identidad colectiva’).

«Quixi ufiertar un tratamientu non colonial, nel sen de dir al orixe, evitando intermediarios. Tratar a la música asturiana como una entidá con vida propia, non supeditada a otros procesos o como un apéndiz de dalgo superior»

PIESLLU

La espresión musical ye un pegollu fundamental de toles sociedaes. Nun  existe comunidá humana que nun la tenga como un elementu estructurante y integrador. Nesti sen, quixi mostrar cómo la música ayuda a construir, nota a nota, la identidá que nos representa y nos fai ser parte d’esta comunidá humana a la que llamamos Asturies.

Xune Elipe.
*Artículu xeneráu a partir de les notes utilizaes na presentación oficial del ensayu ‘Hai una llinia trazada. Historia de la música asturiana’, na Biblioteca d’Asturies (Uviéu) el 3 de febreru del 2022

Mercar ‘Hai una llinia trazada’ na tienda online

Dexa un comentariu

X