La xornada entamaba fría, murnia y lluviosa nun Grau, que si ye exemplu de dalgo nestos años ye d’apostar pola cultura y la tan necesaria memoria democrática. Ayeri yera un día pa poner datos, realidaes y conciencia enriba de la mesa. Asina foi desendolcándose’l programa propuestu pol Gobiernu del Principáu d’Asturies nel actu institucional del 25 payares, Día Internacional Contra la Violencia Machista.
Maria José Miranda, la conceyala d’Igualdá, narraba de primer mano’l so marxe d’acción y ponía nel so discursu munchu enfotu nes violencies silenciaes y la necesidá de siguir lluchando por un camín ensin violencia machista. Les llarimes llegarian al Centru Cultural de Grau de la mano d’Elena Ocejo Álvarez, abogada nel Centru Asesor de la Muyer de Llangréu, col so rellatu concienciónos a toos sobre la doble dureza de ser muyer mayor y víctima de violencia de xéneru. Entá queda muncho por facer, nuna sociedá qu’escaez el llabor d’unes muyeres que trabayaron tola vida y tovía güei, nun pueden dicir adiós al so maltratador por falta de perres o sofitu de los propios fíos.
Dende equí, gustaríame da-y les gracies pola dosis de realidá cola que nos allumó a toles presentes. Depués de conocer y reconocenos nes pallabres d’Elena, llegaría-y la vez a la pieza teatral ‘Amnesia’ de Berta Piñán. Nun tengo pallabres pa describir l’arte con que foi representada, pero si puedo dicir que ser muyer ye saber dende’l minutu unu cómo va tornar el final, ye reconocer la violencia nes sos múltiples vertientes, ye sabela non necesariamente por ti, pero sí por to ma, to güela, una amiga o la vecina. Ye esa quimera, esa mezquina realidá de saber que toes dalguna vez tuvimos cerca una muyer maltratada, pero curiosamente nun conocemos tantos maltratadores.
«Col acompañamientu de Celia Nieto al vigulín y Dani Álvarez col bouzuki, el colectivu Muyeres por Grau foi poniéndose nel centru del escenariu y al rodiu d’un crespón púrpura empezó la danza prima, con ritmu, firmeza, seguridá y unión, dando exemplu de como deberíemos caminar les muyeres siempre, xuntes»
Lo bueno faise esperar y tres las pallabres del presidente asturianu, Adrián Barbón, recordando a Ana Orantes, llegaría la sororidá fecha arte. Col acompañamientu de Celia Nieto al vigulín y Dani Álvarez col bouzuki, el colectivu Muyeres por Grau foi poniéndose nel centru del escenariu y al rodiu d’un crespón púrpura empezó la danza prima, con ritmu, firmeza, seguridá y unión, dando exemplu de como deberíemos caminar les muyeres siempre, xuntes. Asina empezaben a cantar unes cuartetes compuestes por elles mesmes, ensin micros y cola acústica del recien estrenáu Centro Cultural de Grau. Fueron dexando ablucaos a tolos presentes. Un grupu que ta lloñe de ser profesional, unes muyeres con otres ocupaciones, pero con muchu remangu, ganes y sobre too ilusión, fueron cuarteta a cuarteta conquistándonos a toos y dando muestra de les hores d’ensayu y preparación.
El llabor de les organizaciones vecinales ye inconmensurable. Yo mesma, como miembra d’una, puedo dicilo, pero güei ye’l día pa reconoce-y el so llabor a esti colectivu moscón, que non solo trabaya activamente na vida cultural del pueblu, sinón que lo fai al traviés del vehículu de la solidaridá. Muyeres por Grau tien un reditu únicu y ye ver que ye abellugu pa munches muyeres, non namásdel conceyu. Eso nun día como’l d’ayeri ye necesario de manifestar: el so llabor ye perimportante, porque como dicía Elena Ocejo Álvarez, «les muyeres mayores tienden a recluyise y nun tienen espacios propios onde compartir con otres muyeres, tan necesarios pa elles». Equí añadiría yo, Elena, como autora d’estes llinies, que les xóvenes como yo, cada vez acuciamos más de soledá non deseada y que tener abellugos y espacios seguros onde compartir, tamién ye vida pa nós. Asina que puxa’l texer redes interxeneracionales, puxa díes como estos anque axallá nun tener que facelos, y sobre too, puxa Muyeres por Grau pol so llabor.
Suscríbite a les nuestres novedaes
