«Llevo los últimos meses viviendo grandes cambios y, poco a poco, fui tomando decisiones importantes. Quiero anunciavos qu’una d’elles ye alloñame, de forma temporal y indefinida, de los escenarios. Agora quiero y necesito dedicar más tiempu a la mio familia, a la creatividá y a la escritura». Con estes pallabres Héctor Braga anunció en redes sociales la selmana pasada que dexaba de xubir al escenariu col so proyectu artísticu en solitario.
«Gracies por acompañame toos estos años dende’l mio primer discu, allá pol 2004», añadió l’artista sorrayando tamién qu’entá va siguir venceyáu a la Banda de Gaites Picos de Europa – DOP Cabrales, de la que ye director, y de que «esto ye un ‘ta llueu’, non un ‘adiós'», polo que’l etnomusicólogu y multiinstrumentista nun va dexar la so actividá, sinón que fai’l parón xubiendo a escenarios col nome d’Héctor Braga.
Con esta dedisión Braga pausa un carrera de directos qu’entamaron nos años 90 cuando entamó a tocar n’agrupaciones como la Orquesta de Cámara del Nalón y foi ún de los fundadores del grupu folk Llangres. El so camín en solitario principió en 2004 y a lo llargo d’estes más de dos décades publicó dellos álbumes ente los qu’hai asturianada, música tradicional -tanto na so espresión más “pura”, como fusionada a estilos contemporáneos- y temes de composición propia. Tien tamién varios premios algamaos y xiró per toa la Península, Europa y incluso Marruecos.
El so últimu discu ye Rabil. Publicáu en mayu de 2025, nél amuesa’l so soníu más folk, más celta y más rockeru a lo llargo de diez temes nos que rescamplen destacaes collaboraciones y nos que la gaita rabil o zanfona ye la protagonista. Producíu por Javier Blanco (Mägo de Oz, Sôber), nel álbum collaboren una montonera d’artistes: Víctor Manuel, Hevia, Algaire, Baxel, Deira, Joaquín Díaz, Luis Delgado, Óscar Ibáñez y Bango, amás de les bandes de gaites Picos d’Europa, LaKadarma y la berciana Castro Bérgidum.
Suscríbite a les nuestres novedaes
