La programación de música n’asturianu de Xixón nun apara. Tres de celebrar dende xunu’l Xixón Folk, les Xornaes Músico-Culturales, el Concursu de Canción Asturiana «El Comercio», l’Arcu Atlánticu, el Festival Internacional de Bandes de Gaites Villa de Xixón y los conciertos de la Semanona; esti fin de selmana ye’l turnu de la XXXV Fiesta de la Sidra, na que la música’l país va tar presente colos tradicionales Cancios de Chigre, les actuaciones de cuatro bandes de gaites y, per primer vez dende hai años, el conciertu d’un artista contemporaneu: Ún de Grao,
Dende esti xueves 20 hasta’l domingu 23 la Plaza Mayor, la Playa de Pando («Poniente») y la Plaza’l Marqués acueyen la programación musical d’esta Fiesta d’Interés Turísticu. Les actuaciones entamen el día 20 a les 11.30h na Plaza Mayor cola Banda Gaites Saxum y continúen el vienres 21 nel Récord Mundial d’Escanciáu Simultáneu, col que la villa de Xovellanos ha perpasar les 9.833 botelles escanciaes al empar p’asina algamar el récord. Nesta actividá -que ye les 20.30h na Playa de Pando– ponen música la Banda Gaites Noega y la de Llariegu de Sariegu.
El mesmu vienres 21 l’asturianada entemecida a ritmos como la bossa nova o’l rock progresivu va sonar nel escenariu de la Plaza Mayor gracies al conciertu d’Ún de Grao, artista moscón venceyáu a Xixón dende hai años. Y al día siguiente, sábadu 22 a les 21h, son los tradicionales Cancios de Chigre. Nellos, la Sociedad Torner dirixida por Carlos José Martínez fai una «escoyeta de testos y músiques pa la celebración d’esta xornada popular col protagonismu del públicu, el mayor coru del mundu«, como anuncia Divertia, la empresa pública organizadora del certame.
La Banda de Gaites Villa de Xixón pon el ramu’l domingu 23 a esta celebración qu’axunta otra montonera d’actividaes. La formación tradicional va actuar dende les 12h a les 14h pente la Plaza’l Marqués y la Plaza Mayor animando’l Día de la Sidra, nel qu’hai la preba de sidra nes casetes de los llagares participantes nuna de les cites icóniques del branu xixonés.
Suscríbite a les nuestres novedaes
