Va unos díes vio la lluz en YouTube y en toles plataformes musicales ‘La flor de tu linaje’, cantar de composición propia d’Ún de Grao «que nun tien nada que ver cola tradición», como desplica’l músicu. El tema ta en castellanu y nél suena la influencia de la canción d’autor llatinoamericana xunto cola particular manera de cantar del artista moscón. L’amor y la llucha pola xusticia social dan forma a la lletra.
Como diz el propiu intérprete «ye una canción d’amor, pero d’amor hacia la xente que tien unos ideales, ya que tien la coherencia suficiente pa llevalos alantre na so vida. Ye una canción d’amor hacia una persona en concretu, pero tamién hacia tola xente que fai por conseguir un mundu meyor, tola xente que fai por nun dexar pasar les inxusticies ya pola búsqueda del bien común. Ye pa la xente que tien xenerosidá ya valientía».
D’esta manera, Ún de Grao da un pasu distintu na so carrera; tanto por interpretar daqué que nun venga del repertoriu tradicional, como por facelo en castellanu. Sicasí, sigui la calidá musical que define a esti veteranu de la música folk, que ye amás ún de los renovadores de l’asturianada de los últimos años.
Suscríbite a les nuestres novedaes
