La Fundación Municipal de Cultura del Conceyu d’Uviéu abrió la convocatoria de subvenciones pal fomentu y impulsu de la creación y la producción artística correspondiente a 2026, una llinia d’ayudes dotada con 200.000 euros que busca sofitar proyectos culturales desenvueltos nel conceyu y contribuyir al crecimientu del texíu creativu llocal.
La convocatoria, publicada nel BOPA’l pasáu 2 de setiembre, ta dirixida a persones físiques, persones xurídiques y entidaes ensin porgüeyu económicu que desenvuelvan la so actividá, a lo menos, nel ámbitu d’Uviéu. Ente los sos oxetivos figura’l sofitu a proyectos singulares d’interés xeneral destinaos a fomentar y impulsar la creación y el desenvolvimientu del texíu cultural local, con una atención específica al talentu emerxente.
Nel ámbitu musical, la llinia pue suponer una vía de sofitu pa proyectos de creación y producción desenvueltos por artistes y axentes culturales vinculaos a la ciudá, dientro d’una convocatoria qu’entiende l’actividá artística non solo dende la perspectiva de la programación, sinón tamién dende los procesos de creación y afitamientu de nuevos proyectos.
Con esta convocatoria, Uviéu incorpora una nueva ferramienta de sofitu directu a los procesos de creación y producción cultural, con especial interés naquellos proyectos capaces de contribuyir a la renovación y fortalecimientu del ecosistema artísticu llocal. Una llinia que pue tener especial incidencia nes propuestes musicales emerxentes de la ciudá y nos proyectos que busquen convertir la creación artística nuna actividá profesional y sostenida. La convocatoria ta abierta hasta’l 23 de setiembre.
Suscríbite a les nuestres novedaes
