El sector cultural asturianu cuenta con una nueva convocatoria d’ayudes pal desenvolvimientu de proyectos a lo llargo de 2026, nuna llinia que vuelve poner el focu na profesionalización y na proyección esterior. La convocatoria, con una dotación global de 1,24 millones d’euros pa industries culturales, inclúi distintes llinies pa disciplines como les artes escéniques, l’audiovisual, el llibru o les artes visuales, amás del ámbitu musical, que cuenta con una partida específica de 204.000 euros.
Nel casu de la música, les ayudes tán empobinaes tanto a la creación y producción como a la circulación de proyectos, incluyendo xires, participación en feries o festivales y acciones de promoción fuera d’Asturies. Tamién se contemplen sofitos pa la formación y la movilidá profesional, dos aspectos clave nun sector que sigue buscando afitar estructures más estables y ampliar la so presencia en circuitos estatales y internacionales.
La convocatoria ta dirixida a profesionales y empreses con actividá n’Asturies y va resolvese en réxime de concurrencia competitiva, con plazu de solicitú abiertu hasta’l 3 de xunu, siguiendo les bases publicaes nel BOPA. Estes llinies, representen una oportunidá pa la música asturiana pa impulsar nuevos proyectos, ganar presencia fuera y siguir consolidando un ecosistema n’evolución constante.
Suscríbite a les nuestres novedaes
