Continúa’l ciclu Háblame de Música qu’entama la Biblioteca Pública Xovellanos de Xixón y, tres de programar les charres d’Alicia Álvarez y Rubén Bada hai unos meses, esti xueves 5 a les 19h ye’l turnu de Vero Rubio. La multiinstrumentista va falar de música tradicional y clásica cola ponencia Del chigre al auditoriu, na que, como ella mesma diz, va «insistir na calidá ya l’aportación de la música tradicional asturiana». Amás, l’artista canguesa tien una axenda completa estos díes: el sábadu 7 actúa en Bisuyu y el llunes 9 nel CPEB Carlos Bousoño de Bual.
«Pasen dos coses que son les que m’impulsaron a faer esta charra, a crear Brassica Trío y a faer la música que faemos en Buir. Per un llau, l’enclín elitista que tien la música académica/clásica a sentise lo meyor del mundu, que siempre me paeció risible y curtiu de mires; ya pel otru, l’enclín de la música tradicional de sentise pouca cosa (ya equí eso tenémoslo bien enraigonáu); cuando nun puedes falar d’una ensin entender la otra, y a lo llargo de la hestoria hai una montonera pruebes de la conexón inevitable ya indixebrable qu’hai ente dambes. Lleven bebiendo una d’otra tola vida», desplica Vero Rubio sobre la charra que va dar esti xueves.
Esta música profesional añade amás que «tuvo que llegar el movimientu del arte nacionalista pa racionalizar daqué que yá taba pasando, qu’ensin la música tradicional de cada sitiu, ensin eses característiques que la faen única, la música clásica y non clásica, la música polo xeneral, sería daqué plano, ensin carácter, como si faláramos toos inglés o chinu ya escaeciéramos el restu de les llingües del mundu». Tamién sorraya que «si amás somos conscientes de que de la conxunción de les capacidaes y peculiaridaes de dambos estilos -de tolos estilos posibles-, surdieron dalgunes de les pieces más guapes de la hestoria de la música, ves claro que ye’l camín sensatu, nun ye l’únicu, pero ye sensatu».
D’esta manera, Rubio comenta que na so charra va reparar sobre manera «nel casu asturianu, que ye particular» y qu’asina desplica: «España siempre miró más escontra’l sur. Equí faltónos un O’Carolan que publicara los primeros trabayos nel sieglu XVIII, un Vaughan Williams de sonadía internacional, un Sean O Riada que la punxera en valor col sofitu de les instituciones… Pero tuvimos a Maria Teresa Prieto, Korsakov yá s’afitó en nós nel sieglu XIX, Falla averóse, Joaquín Nin -padre y sobremanera’l fíu-… estos creadores de música académica fixeron guapura cola nuesa guapura y la sacaron de les nueses fronteres».
La multiinstrumentista tamién sorraya que «muncha xente vieno a recoyer el nuesu arte y pasó pela nuesa tierra: Alan Lomax, Pedrell, Inzenga, Rafael Calleja y José Hurtado anduvieron cerca. Amás debémos-y enforma a Martínez Torner, tenemos a Xosé Ambás y a Ramsés Ilesies faciendo un trabayu impagable y toles voces que la guarden na memoria, y tola xente que la toca». D’esta manera, na so charra va dir poniendo «música preciosa» y falar de «cómo se fixo n’otros sitios y n’otres dómines, y de cómo pasó eso de xuntar estilos y faer unu, faer música, con mayúscules y ensin más».
Amás de la interesante charra d’esti xueves en Xixón, Vero Rubio tamién tien otros dos actos más estos díes, coincidiendo coles programaciones que delles instituciones públiques entamen pol 8 de marzu, Día Internacional de la Muyer. La canguesa va tocar na xornada Educación rural: la vocación que cura que se celebra esti sábadu nel pueblu de Bisuyu, nel conceyu Cangas. Nel conciertu va pegar un «un repasín a Vou« -el so primer álbum en solitario-, pero tamién tocar otres coses de lo que ta faciendo agora: Brassica Trío, Buir y la suite Al Son de la fame, «que foi escoyida pa recibir una ayuda a la composición de la Fundación SGAE, ya recueye cantares del occidente ya piezas orixinales, ya tou eso dientro de la mía manera d’entender la música ya l’arte».
«Ía pa mi un honor xugar en casa, pero amás, esta ía la casa de mía tía Telvina, hermana de mía madre, que vive en Bisuyu», valora Vero Rubio d’esti conciertu al que-y sigue otra actividá pública: el llunes 9 a les 11.30h la mañana va participar na VII Semana de la Igualdad qu’entama’l CPEB Carlos Bousoño de Bual compartiendo charra col alumáu d’esti centru.
Suscríbite a les nuestres novedaes
