Ximiélgalo Radio Show, el proyectu radiofónicu centráu nos sones xamaicanos y qu’usa l’asturianu como llingua vehicular, va llanzar el 7 de marzu Ximélgalo!, un cenciellu en siete pulgaes pa festexar los sos cinco años d’emisión en Radio Kras (105.0 FM de Xixón). Nesti single alcuéntrase un corte instrumental interpretáu y compuestu pola sección de vientos extremeña Sherlock Horns (Pedro Caballero y Toni Martín) y producíu, grabáu y mezcláu pol sevillanu Mario Garcia de Cool Up Records.
Esti tema yá ye un clásicu pal públicu reggae nel Estáu español por mor qu’esta dupla tienlu interpretáu en directo en sitios tan destacaos pa la escena como’l parque de La Alameda de Sevilla o festivales como Rototom Sunsplash o Gijón Sound Festival, amás de ser la sintonía actual d’esti programa asturianu de radio.
Tres dellos años siendo un dubplate esclusivu que namás podía sintise nos entamos de los episodios de Ximiélgalo Radio Show, nes pinchaes de Miguina Selektah (responsable de Ximiégalo) o nos shows en vivo de Cool Up Records y Sherlock Horns, agora’l sellu dedicáu a los sones xamaicanos publica esti tema xunto a la so correspondiente y esclusiva versión dub. Too ello nun vinilu de calidá estra con una gordura superior a l’avezada nos singles y una edición llimitada de 200 copies que va vendese a 14 euros.
Les copies de Ximiélgalo! va poder conseguise a traviés del Instagram del proyectu, per corréu electrónicu y en dalgunes tiendes de discos. Amás, va presentase en Xixón el próximu sábadu 7 de marzu a les 11.30h de la mañana na tienda de vinilos Mita Record Store (asitiada na plaza del San Agustín) con una actividá na que’l propiu Miguina Selektah va tar esbillando temes ska, rocksteady, reggae revival, dub, steppas, rub a dub y otros sones xamaicanos. Ximiégalo! ye la segunda referencia discográfica de Ximiélgalo Records, dempués de qu’hai dos años llanzara’l single audiovisual ‘Pallabres n’asturianu‘ de Fred Warrior.
Suscríbite a les nuestres novedaes
