Tania Pereira, Vero Rubio -ganadora del XV Premiu Camaretá- y Rita Ojanguren formen Nacasa Trío, el nuevu proyectu de les tres músiques asturianes. La so primer actuación ye güei, vienres 6 de setiembre, nel marcu de los actos institucionales pola celebración del Día d’Asturies, a les 20.30h nel Monasteriu de Santa María de Santalla d’Ozcos.
Esta interesante formación naz a partir de la propuesta d’Abel de Mialma Producióis -tamién de l’asociación Nia (Nosoutras ideamos arte)-, y son elles les que decidieron que Nacasa diba ser «falar del raigañu, de los nuestros oríxenes, de la nuestra casa». Dempués de delles xuntances a distancia, entamaron el procesu de construcción del so soníu de forma coleutiva, partiendo de temes de composición propia de cauna d’elles y llevando los sos estilos personales a les pieces de les demás.
Sobre la continuidá del proyectu, dicen: «tamos esfrutándolo muncho… sería raro qu’esto quedare equí…». Pel momentu, l’actuación d’esta tarde promete ser especial porque, según elles mesmes confiesen, «hai munchu mimu, munchu ciñu y muncho saber facer nesta propuesta».
MERCA DISCOS DE MÚSICA ASTURIANA
Suscríbite a les nuestres novedaes
