La escena musical asturiana despedía 2024 recibiendo’l primer llanzamientu de Vérsica, un proyectu musical encabezáu polos componentes de Cerezal Gonzalo Pumares y Marcos Álvarez basáu nun cuentu infantil escrito por Pumares. Esta iniciativa orixinal axunta lliteratura; música folk, rock y pop y diseñu artísticu; y el sábadu 8 de marzu va ser la primer oportunidá de vela en directo. La cita va ser les 20h nel CPI de Llugones y con entrada llibre.
Vérsica ye un cuentu que trescurre al traviés de diez cortes musicales y nel que caún d’esos diez cortes ye un poema que, de dalguna mena, esplica una parte de la historia del protagonista del cuentu: un vieyu que yera mozu. Nél recuéyense poemes d’autores consolidaos d’anguaño, de la nomada Segunda Xeneración, o de los años venti del sieglu pasáu. Nomes como Miguel Monteavaro, Xurde Fernández, Vanessa Gutiérrez, Xabiero Cayarga, Taresa Lorences, Nené Losada o Fernán Coronas tán presentes na esbilla de los testos nel que se tuvieron mui en cuenta los sentimientos del protagonista: la soledá, l’abandonu, el mieu o la perda, pero tamién l’amor a la tierra, la conexón cola naturaleza y la felicidá.
Musicalmente Vérsica une elementos del folk acústicu col rock y el pop d’anguaño. La grabación fíxose en dellos espacios pero, sobre manera, nos estudios Tutu de Corvera. Nella participaron artistes venceyaos a estayes mui dixebraes dientro de la música d’Asturies. Amás de los nomáos Marcos Álvarez y Gonzalo Pumares, formen parte d’esta obra Juan Yagüe, Álvaro Bárcena, Juan Carlos Vega, Sergio Rodríguez, Wilón DeCalle y Juanjo Díaz, quedando les voces a cargu d’Ana Belén Rodríguez, Esther Yuste, Isa R. Infiesta y Andrea Álvarez, que foi la primer cantante de Cerezal. La narración del cuentu fíxola una neña de 6 años nomada Ludara.
Les artes plástiques son otru de los pegoyos de Vérsica xunto a la música y la lliteratura. Les canciones van ver la lluz en formatu físicu envueltes nuna escultura; un envoltoriu únicu obra del artista Miguel G. Díaz. Va ser la primer vez qu’un proyectu de música asturiana edita la so obra nun formatu asina y, por mor d’esta complexidá, los responsables del proyectu llenden la primer edición a namás 250 unidaes numberaes. Quien quiera facese con una pue acutala a traviés del bandcamp de Versica.
Suscríbite a les nuestres novedaes
