Herbamora presenten Lluna de collecha, una pieza audiovisual dirixida y realizada por Cortexiphan Producciones cola que la formación ilustra’l que foi’l primer single del so tercer discu, 286 llunes, asoleyáu en payares de 2024. El videoclip ta inspiráu na distopía feminista El cuento de la criada, una obra lliteraria de Margaret Atwood tornada en serie de televisión.
Como elles mesmes despliquen, quixeron desfacese de les capes coloraes que visten les criaes nel universu d’Atwood «al traviés del amor propiu y l’empoderamientu femenín». L’altu d’El Naranco, l’Archivu Históricu d’Uviéu y La Llaboral (Xixón) son los escenarios principales de la pieza. ‘Lluna de collecha‘ ye una composición de Ruth Suárez sobre una siega de Riballagu (Senabria), una mirada a la vida d’antaño y al pocu valir que se-y daba al trabayu de les muyeres. Poro, les cinco integrantes d’Herbamora apaecen na pieza amosando rudimentos y ferramienta venceyada al llabor na tierra.
Herbamora, banda formada por cinco muyeres percusionistes y cantantes venceyaes a la cultura tradicional tornaron dempués de 11 años de parón con un trabayu discográficu enllenu de presencia y sensibilidá integráu por cinco cantares nos que les percusiones, el xuegu de voces y la electrónica son protagonistes. La presentación del proyectu va ser el 22 de marzu nel escenariu de La Benéfica.
Suscríbite a les nuestres novedaes
