L’Infiestu va convertise esta fin de selmana nun de los puntos d’alcuentru de la música tradicional asturiana cola celebración, del 11 al 13 de setiembre, de les VI Xornaes del Vigulín Tradicional y, los díes 11 y 12, del IV Alcuentru de Folclor de L’Infiestu. Dos propuestes venceyaes pola música de raigañu van llevar conciertos, formación, sesiones y folclor a dellos espacios de la llocalidá.
Les Xornaes del Vigulín Tradicional van entamar el vienres 11 na Casa la Cultura, a les 19.30h, cola presentación del eventu y un homenaxe a Antonio Espina, vigulineru tradicional de Piloña. Una hora más tarde va actuar la irlandesa Sorcha Costello, y la xornada va zarrar con una sesión vigulinera na Cervecería La Traviesa. El sábadu 12, El Prial va acoyer los cursos de vigulín, organizaos en trés niveles, y pela nueche La Bandina’l Tombo va actuar na mesma cervecería, onde darréu va haber una nueva sesión. Les xornaes van rematar el domingu 13 con un taller de vigulín pal baille y l’alcuentru vigulineru.
La programación formativa de les Xornaes inclúi un nivel d’iniciación gratuitu y ensin inscripción previa, amás de dos niveles pa intérpretes con mayor esperiencia y un taller específicu de repertoriu de vigulín pal baille. El profesoráu va tar formáu por Dolfu R. Fernández, Sorcha Costello, Celia Nieto, Rubén Bada y Santi Galguera.
En paralelo, el IV Alcuentru de Folclor de L’Infiestu va ocupar les cais y los chigres de la localidá. La cita, entamada por La Benéfica, incorpora esti añu una xornada más y abre’l programa’l vienres 11 col conciertu de Casapalma, dúu cántabru que combina música tradicional y electrónica, nuna actuación prevista en La Benéfica. Les entraes tienen un preciu de diez euros.
El sábadu 12 va ser el turnu del folclor pela cai, con una ronda que va entamar a les doce del mediudía y na que van participar Prau Llerón, d’Asturies; Eingo Taldea, del País Vascu, y Pan Sen Fron, de Galicia. La propuesta caltién l’espíritu del Alcuentru, que busca sacar la música y el baille tradicional de los escenarios pa llevalos a les places, los chigres y les cais de L’Infiestu. La organización vuelve amás a convidar a participar a músicos, cantantes, bailladores y a tola xente que quiera sumase a la ronda.
D’esta manera, L’Infiestu va vivir tres díes nos que’l vigulín, les sesiones, el baille y les distintes formes de la música tradicional van compartir protagonismu, con dos iniciatives que convierten la llocalidá de Piloña nun puntu d’alcuentru pa la música de raigañu esta fin de selmana.
Suscríbite a les nuestres novedaes
